Umkhuleko woxolo ususe umsindo
Kuthiwa kuthukwe umhleli walo mcimbi
UTHUKWE yikhansela leANC lambiza nge- agent ye-IFP umgqugquzeli womkhuleko wokulwa nokubulawa kwabantu besifazane obusenkundleni yezemidlalo eMabhanoyini, KwaNondabuya, eJozini, ngoMgqibelo.
Lo mkhuleko ubuhanjelwe nanguSomlomo wePhalamende, uNkk Baleka Mbete - obeyisikhulumi sosuku - ozithole ebishe phakathi kwabalandeli be-IFP, kwazise abeqembu lakhe bebengabonwa nangalukhalo.
Yize umcimbi uqale isikhathi sawo sesidlule ngamahora alinganiselwa kwamane, lokho kakusizanga ukuba abantu bathutheleke khona njengoba bebeyimbijana. Bekufanele uqale ngo-09h00 kodwa wagcina uqale ngo-12h45, abantu sebelahle ithemba.
Ukungafiki kwabantu kuchazwe njengomphumela wesenzo sekhansela le-ANC eliyingxenye yobuholi baleli qembu eFar North Region (Umkhanyakude), okuvele ukuthi libize umhleli walo mcimbi nge- agent yeNkatha.
Izikhulumi zishiye ezingalazi kuleli khansela - yize belingekho - zilichaza njengomfana omncane okusamele akhule ngokomqondo. Bezithi lizame ngakho konke ukuthi lo mcimbi ungaphumeleli.
UNkz Prizzer Ndlovu, ongumgqugquzeli walo mkhuleko, uthe akahlangene nezombusazwe kodwa unesikhathi eside aqala ukuhambisana noNkk Mbete bekhulekela izingqinamba, ikakhulukazi ukubulawa kwabantu besifazane.
Uthe eJozini ubizwe yintsha ecele ukuba afike nethimba ase- benzisana nalo bayokhuza umonakalo wokubulawa kwabantu abadala, behlaselwa yizingane zabo ezicwile ezidakamizweni, ikakhulukazi insangu notshwala.
“Ngiyaqala ukufika lapha eJozini, ngizihlalela eGoli lapho ngisebenzela khona. Ngithole incwadi ebhalwe yintsha yakule ndawo icela ukuba sizokhuleka. Ngenxa yokuthi kayikho imali etheni esiyitholayo, ngifake isicelo soxhaso kuMasipala wesiFunda uMkhanyakude, kodwa wangafuna ukusixhasa.
“Kuthe uma ngicela kowaseJozini, bakhombisa ukungemukela futhi bathokoziswa nawukuthi siza nosomlomo. NgoLwesihlanu ngithole ucingo kubaba u...... (emgagula ngegama nesibongo) ongibuze ukuthi ngingubani mina engingaletha usomlomo kule ndawo ngaphandle kwakhe, wathi ngiyitha- thephi imali yokwenza lokho. Ngizamile ukumchazela ukuthi kangihlangene nezombusazwe, wathi ngiyi- agent yeNkatha,” kusho uNkz Ndlovu.
UMnu Sbongeleni Myeni (24), obhale incwadi, uthe: “Kuthe ngolunye usuku siyobhala izivivinyo zokuphela konyaka, saluxoxa lolu daba lwezinkinga ezisihlasele.
“Siphume nekhambi lokuthi sibhalele umama uNdlovu ngoba sijwayele ukumbona ohlelweni iDumisa oludlala kwiDstv. Sicele ukuba kuzokhulekelwa izinkinga zokubulawa kwabazali bethu, ukubulawa kwabantu abanebala elimhlophe, izingozi zomgwaqo, amadimoni aphazamisa ukufunda ezikoleni nezinye izinkinga eziningi.
“Konke lokhu kuyasikhathaza. Sidumele uma sithola ukuthi kukhona abaphume umkhankaso wokulwa nempumelelo yalo mkhuleko ekubeni sinabo lapha eJozini.”
IMeya yaseJozini, uDkt Delani Mabika, ithe ithokoziswa wukunyathela kukasomlomo endaweni yayo.
“Ngidumele uma ngizwa ukuthi omunye oyikhansela kumasipala wethu ubelokhu ethuka umhleli ethi uyi- agent yeqembu lethu. Okungiphatha kabi kakhulu wukuthi ewadini yakhe lo baba kusanda kudlwengulwa ugogo omdala maqede wagwazwa.
“Uma ungumholi oqotho uyakuthokozela ukufika komkhuleko ngoba yiyona ndlela yokuxhumana noMdali owakuletha emhlabeni,” kusho uMnu Mabika.
UNkk Mbete uthe: “Ngisuke eThekwini sengazi ukuthi kukhona abalwa nokufika kwami la, futhi lo muntu ohola lo mkhankaso uzama ngawo wonke amandla ukufeyilisa lo mkhuleko. Ngizitshele ukuthi noma ngabe bathathu (abawuhambele) ngizofika ngikhulume nabo.
“Lona ngimfanisa nomfana omncane osazokhula abone ukuthi akuyena yedwa okwazi ukwenza izinto zenzeke. Lapha sizokhuleka, hhayi indaba yepolitiki. Lo mkhankaso wethu sawuqala ngo2016 eNaturena, eGoli, kuhlasele izinkinga zokubulawa kwabantu besifazane. Okungithokozisayo wukuthi lapho sifike khona kusala kunomehluko.”