Kubalulekile ukuzikhuculula ngendlela ephephile
ASEPHELILE amaholide kaKhisimusi lapho bekudliwa khona izibiliboco ezahlukene nsukuzonke, njengoba sekuqala unyaka umzimba udinga ukukhucululwa ( detox).
Ukukhuculula umzimba kuyasiza ekutheni umuntu ahlanze ingaphakathi lakhe, abenesikhumba esihle. Kuvamile ukuthi abantu abaningi bahambele kude nokukhuculula wonke udoti ongene emzimbeni ngenxa yezibiliboco ngoba besaba ukulandela imigomo yakhona.
Zihlukene izindlela zokukhuculula umzimba, zivame ukuholela nasekubeni ozisebenzisayo abe nesikhumba esihle. Abanye abantu bahlanza imizimba yabo ngokugquma ngoba kunomthelela omuhle ekukhameni amafutha azike esikhunjeni
asenza sichiche, yize kuvele kusize ukukhuchulula amafutha asebusweni kuphela.
UDkt Nhlakanipho Gumede - obuye abhalele ILANGA ingosi yezempilo - uthi kubalulekile ukuthi abantu uma bekhuculula imizimba baphuze kakhulu amanzi ngoba ayasiza emzimbeni futhi aphinde enze nesikhumba sibe sihle.
Kubalulekile ukuthi ukudla komuntu kubhalanse ukuze umzimba uzothola izithako ozidingayo, ungashodi ngalutho. Uthi abantu bake benze iphutha lokuthi uma bekhuculula imizimba, badle kakhulu imifino besebezincintsha inyama, kanti lokho kakulungile ngoba umzimba uyawadinga ama- protein.
“Angikukhuthazi ukuphuza into yokukhipha uma uzikhucu- lula ngoba ingakuyisa kakhulu endlini encane uze uphelelwe ngamanzi emzimbeni, okungagcina ngokuthi uvuke esibhedlela. Ukuze umzimba usebenze kahle, kumele ube namanzi anele emzimbeni.
Ukuchatha nokuphalaza nakho kangikukhuthazi ngoba kwesinye isikhathi izinto ezisetshenziswayo akwaziwa ukuthi zithakwa ngani futhi zizokuphatha kanjani ngoba kuyenzeka ukuthi isikalo sesithako sincane noma seqile kanti lokho kuyingozi,” kusho uDkt Gumede.
Uthi ukukhuculula akumele kuthathe izinsuku ezingaphezulu kweziwu-30.
Ukugxumela izinto eziningi zokuzikhuculula ezinga- thathwa njengeziphephile - ngenxa yokuthi aziqinisekisiwe ngodokotela -kungagcina kwenza lowo muntu aphume engena ezibhedlela ngenxa yomonakalo angazithola esebhekene nawo.
Uthi kunezinhlobo zokudla okunempilo okumele umuntu azidle ukuze uhlelo lwakhe lokuzikhuculula luhambe kahle.
Wukudla okune- fiber, okubalwa i- rice elinsundu, iklabishi, izithelo nemifino.
Wukudla okuno- vitamin C, okubalwa kukhona amawolintshi nekhabe.
Wukuphuza amanzi ayisikalo sezingilazi eziwu-8 ngosuku.