UMBONO WOMHLELI:
KUJWAYELEKILE emhlabeni jikelele ukuba kuthi noma izinkinga ezweni zehlula ukwenza, kodwa osopolitiki bathembise izulu nomhlaba, bathi wubala lolo, bona neqembu labo bazokwazi ukuzilungisa uma ubavotela.
UMengameli Cyril Ramaphosa wenze okuhlukile kunokujwayele ukwenziwa ngozakwabo enkulumeni yakhe yomhla ka-31 kuZibandlela (December) yokuphetha unyaka, abeyibhekise esizweni, okuyinkomba yobunzima besimo iNingizimu Afrika ebhekene nabo.
Uma sihlala endabeni, izinkinga ezinkulu ezibhekene nezwe esingazibala; wukwehluleka kweqembu eliphethe i-ANC, ukulawula uhulumeni ngendlela efanele ( good and efficient governance), ukwesweleka kwemali kuhulumeni nasezinkampanini zombuso ezifana ne-Eskom, noSouth African Airways, ukubala ezimbalwa, emuva kweminyaka yebiwa isidana, inkohlakalo esaqhubeka namanje, ukwesweleka kwemisebenzi, ubugebengu ezweni nokuntengantenga komasipala ngenxa, phakathi kwezinye izizathu, yokuqashwa ngokobuqembu kwabantu abangawazi umsebenzi.
Umengameli, ojwayele ukushumayela ivangeli lokuthi ukungena kwakhe esihlalweni kufana nesimo sokuntwela ezansi ( new dawn) - lapho kuzolungiswa khona okonakele ezweni - enkulumeni yakhe ukubeke kwacaca ukuthi izwe libhekene nezinkinga ezinzima, wathi kuzodinga ukuba kuthathwe izinqumo ezinqala ukulungisa lezi zingqinamba ukuze izwe lisimame.
Ngokubona kombhali wale ngosi, lena kube yinkulumo ebaluleke kakhulu kamengameli ngaphezu kwazo zonke aseke wazenza selokhu ethathe lesi sikhundla ngoba ekugcineni usekhombise ukuthi uyabuqonda ubunzima izwe elibhekene nabo.
Lokhu kunika inhlansana yethemba lokuthi mhlawumbe kukhona izaba ezisengenziwa ukulungisa izinkinga zezwe, inqobo nje uma ozakwabo eqenjini lakhe i-ANC nabo bekuqonda ukuthi izwe linezinkinga, kufanele zilungiswe ngokushesha.
Empeleni yingane kuphela engaboni ukuthi leli lizwe lethu libhekene nezinkinga ezesabekayo, ezingaba nomthelela uma kungenziwa lutho ukuzilungisa, wokuba liwe bhu phansi, lifane namanye amazwe ase-Afrika asegajwe yizinkinga iminyaka.
La mazwe, ayengamakoloni amazwe aseEurope phambilini, athola inkululeko ngeminyaka ka-1950 neka-1960, kodwa namanje asakhasa. Asizwa yila mazwe asentshonalanga ngemali ukuze akwazi ukondla izakhamizi zawo, okulihlazo ngoba sekuphele iminyaka ecishe ifike ku-60 akhululeka ekuphathweni ngabelungu kodwa namanje akakwazi ukuzimela wona ngokwawo.
Isimo sibi kwamanye ala mazwe ngendlela yokuthi izinkulungwane zabantu base-Afrika zibeka impilo yazo engozini, zinqamula amazwe zifudukela e-Europe ziyofuna amathuba angcono empilo.
Uma nathi singenzi lutho ukulungisa okonakalayo, ukwebiwa nokuxhashazwa kwemali kusukela komasipala nakuhulumeni kazwelonke kuqhubeka, izigilamkhuba zingaboshwa, nathi sizogcina sikhangeza kwamanye amazwe, siboleka imali nasezinhlanganweni ezifana no-World Bank ne-International Monetary Fund (IMF).
Yebo, kuwumsebenzi kamengameli ukunika ithemba kubantu, kodwa futhi kakufanele ukuba afihlele izwe izindaba ezimbi ngoba ngeke sikwazi ukuqala ukulwa namadimoni ethu nxa sikhohlisana ngokuthi konke kuhamba kahle kodwa inqola ibe ibheke eweni.
UMnu Ramaphosa kufanele atshele izwe iqiniso libaba linjalo, angafaki ushukela singekho isidingo. Uyihlabe esikhonkosini enkulumeni yakhe yokuvala unyaka.