LUBULAWE NGAMAPHUTHA OBUNGANE USUTHU LUDLIWA
UKHALE ngamaphutha awubungane uCavin Johnson ongumqeqeshi wamaZulu FC abhudluzwe yiPolokwane City ngo-3-2 kowe-Absa Premiership ngoMgqibelo ntambama e-Old Peter Mokaba Stadium, eLimpopo.
Amagoli ePolokwane abhakuziswe enethini nguBongile Booi ngomzuzu wokuqala namabili kaWalter Musona ngoka-17 nangoka-45. AwoSuthu ashaywe nguBongi Ntuli ngomzuzu ka-28 noSiyethemba Sithebe ngoka-51.
UJohnson uthi nakuba ewuvule kabi unyaka kodwa unethemba lokuthi abadlali bakhe bazowagwema amaphutha awubungane uma le kilabhu seyibhekene neHighlands Park koweligi ngoMgqibelo ngo-20h15 eKing Zwelithini Stadium, eMlazi.
“Yithina esiyiphe umdlalo iPolokwane okuyisimo esingehli kahle uma le nto yenziwa ngabadlali bezinga eliphakeme. Yize benze amaphutha angenise amagoli kodwa ngokomdlalo jikelele bawugijime kahle.
"Emdlalweni neHighlands kuzomele baqikelele ukuthi bangawaphindi nhlobo la maphutha kwazise (iHighlands) idlala ibhola elisezingeni eliphezulu.
"Ngiyazi ukuthi u-Owen Da Gama (ocija iHighlands) uyakwazi ukucuphela umgogo izitha,” kusho uJohnson.
UJozef Vukusic ocija iPolokwane, uncome kakhulu uSuthu ngendlela oludlale kahle ngayo. Uthi uyazi ukuthi ukuthola amagoli amabili ngokushesha yikhona okubasizile kwazise izitha bezingalindele.
Uthi nakuba beluphuthume nga- magoli uSuthu kodwa belulwa, lungafuni ukugebisa amakhanda.
Okuhle oSuthwini ngomdlalo neHighlands wukuthi bonke abadlali bazokube bekhona kwazise uButholezwe Ncube kuthiwa kakukubi njengoba elimale kowePolokwane.
Abalandeli bayanxuswa ukuqala ukuthenga amathikithi ezitolo zakwaTicketPro kwazise uSuthu lulindele izinkumbi zabalandeli njengoba neHighlands ivutha ingabaselwe okucace ibambana ne-Orlando Pirates ngo-2-2 ngoMgqibelo ebusuku eTembisa. Amathikithi abesilisa abiza u-R40 kanti awabesifazane nezingane azotholakala ngoR20 nje kuphela.
Yithina esiyiphe umdlalo iPolokwane okuyisimo esingehli kahle...