UTHONGATHI FC LUQINISA UDONGA NGOWASE-CAMEROON NOWASE-SENEGAL
LUNGASE luhlabane ngabadlali bokufika uThongathi FC oluvule unyaka kahle lunqoba iTshakuma Tsha Madzivhandila ngo-2-1 koweNational First Division (NFD) ngoMgqibelo eThohoyandou Stadium.
Amagoli olunqobe ngawo uThongathi FC avalelwe enethini ngu-Athi Sitshwele noPhilani “Wele” Gumede ngesiwombe sesibili kwathi elokuzama ukugqiba ihlazo leTshakuma leza noWonderboy Makhubu.
UNkosinathi Chili ongomunye wabanikazi boThongathi FC, utshele leli phephandaba ukuthi lizothi liphela leli sonto bazokube sebeqede konke ngabadlali bokufika ababagaqele. Uthi bobabili badlala emuva njengoba omunye esuka eSenegal kanti omunye uvela eCameroon.
Uthi uzobhubhisa ngalaba badlali kwiNFD. Uthi inkinga enkulu wukuthi njengoba besaqedela izingxoxo nje, maningi amakilabhu agijima kwi-Absa Premiership abagaqele yingakho engafuni ukubadalula okwamanje.
“Simatasa kakhulu emakethe ukuqondisa indaba yabadlali yingakho kusithokozisile ukuqeda konke noKhayalethu Mjoli benoCheslyn Jampies. Sisazoqhubeka nokungena emakethe, kasimile kwazise unzima umzuliswano wesibili kwiNFD.
Kumele ube nabadlali abaningi abazokwazi ukugcina umoya wokuncintisana ngaphakathi ekhempini. Kuningi okwenzeka emzuliswaneni wesibili ngoba abadlali bayalimala kumbe bathole amakhadi.
Yingakho singafuni ukutatazela ngemizuzu yokugcina sekuvalwa iwindi lokuthenga abadlali,” kusho uChili.
Mayelana nodaba lukaCelimpilo Ngema ofunwa yiChippa United, uthe sebelinde ukuzwa izikhulu zeChilli Boys ngodaba lwalo mdlali kwazise konke bakwenzile sekumele kube wuhlangothi lwabo oluqondisa izinto.
UChili uncome kakhulu iqhinga abalenzile lokuxoxa nabadlali ngaphambi komdlalo weTshakuma ngobumqoka bokungalahli ithemba kwazise amakilabhu angaphezulu kubona alahla amaphuzu okubanika intuba enhle yokushoshela benganakwe wumuntu.
Uthi bathathe isinqumo sokuthi imidlalo yasekuhambeni bazozama ukulwela iphuzu kuyona kuthi kweyasekhaya bangadedeli lutho ukuze bazibone belwela ukunyukela kwi-Absa Premiership.
Isiyonke imiphumela yemidlalo yeNFD ihambe kanje: TS Sporting 1, Mbombela 2; Stellenbosch 2, Royal Eagles 0; Galaxy 3, Bay 0; Cosmos 0, Maccabi 1; Tuks 1, Kings 1; Tshakuma 1, UThongathi 2; UBuntu 2, Ajax 3; Spurs 1, Cape Umoya 2.