Ukhala ngezinsongo olwisana neKZNA
Uthi uthukwe ngomfonele ngenombolo efihliwe
UZWAKALISE ukuthi usethola izinsongo zokumesabisa uMlungisi Wosiyana osekhaleni labantu abalwa nokuba uMengameli weKwaZulu-Natal Athletics (KZNA), uSello Mokoena, ehle esikhundleni sakhe njengoba i-Athletics South Africa (ASA) yamisa yonke ibhodi yesifundazwe.
UWosiyana uphumele obala ngokuthi uMokoena kumele ahloniphe umyalelo we-ASA, aphume esikhundleni sakhe ukuze ezokugijima zizoqhubeka esifundazweni. Ukunqaba kukaMokoena ukuhambisana nomyalelo we-ASA, kuholele ekutheni uWosiyana ahlanganise amakilabhu esifundazwe ukuba akhulume ngazwi linye, ukuba asize ukukhipha uMokoena emahhovisi eKZNA aseKings Park Athletics Stadium, eThekwini.
UWosiyana utshele ILANGA izolo ngeSonto ukuthi ngoMsombuluko wathola ucingo luvela enombolweni efihliwe, etshelwa ukuba ahlukane nale nto ayenzayo yokuhlohla amakilabhu. Uthe obe- fona umsole ngokuthi ulwa le mpi ngoba nakhu egaqele ukuba ngumengameli weKZNA.
“Ngithole ucingo enombolweni efihliwe ngoMsombuluko luvela kumuntu obengisongela, engithuka engibiza ngongqoshishilizi ekuketuleni umengameli (weKZNA). Ungithuke ngayo yonke inhlobo yenhlamba. Unqabe waphetha ukuzisho ukuthi ungubani. Ukungithuka kwakhe kunginike omkhulu umfutho wokuba ngilwe. Ukungafuni ukuphuma kwabanye abebeyingxenye yebhodi ehhovisi kwenza ngicalelwe wukuthi kukhulu abakufukamele.
"Ngizokulwa kuze kube sekugcineni,” kusho uWosiyana ophethe ngokuthi akalivulanga icala ngokwethukwa kwakhe.
Sekuvulwe iWhatsApp group lapho kubhungwa khona mayelana nezinto ezithinta abasubathi besifundazwe.
Amakilabhu aKwaZulu-Natal azophinde ahlangane ngoLwesithathu ntambama eClub House yeWestville Athletics Club ukuzobhunga ngesimo sawo njengoba ebehlangene nanyakenye.
UGoodman Cele oyiMenenja yeKZNA uzwakalise ukushaqeka ngalezi sinsongo okuthiwa zibhekiswe kuWosiyane. Uthe uzoqala uphenyo ngazo uma esebuyele ehhovisi kwazise ubengekho ngenxa yomshophi obuvele emndenini wakhe.
“Lolu daba lubucayi kakhulu. Yize ngiqala ukuluzwa kodwa ngizolulandelela uma sengiqale emsebenzini kuleli sonto ukuzama ukuthola umnyombo walo,” kusho uCele.