Bakhonjwe ngenjumbane abePirates
Kumele balungise amaphutha koweChilli Boyz
UMQEQESHI we-Orlando Pirates, uMilutin “Micho” Sredojevic, ukhomba ngenjumbane abadlali bakhe ukuba balilungise bona iphutha abalenze emdlalweni weHighlands Park.
IBucs ishayane yaze yabukana neHighlands kuba ngu-2-2 koweAbsa Premiership ngoMgqibelo ebusuku eMakhulong Stadium, eTembisa. Amagoli eHighlands ashaywe nguSiphiwe Mahlangu ngomzuzu ka-59 noPeter Shalulile ngoka-66, kwathi aweBucs ashaywa nguThembinkosi Lorch ngoka-60 noKudakwashe Mahachi ngoka-81.
IBucs kuzokuthi kusasa ngoLwesibili ngo-19h30 ibhekane neChippa United koweligi e-Orlando Stadium, eSoweto.
USredojevic uthi nakuba ezakhe zikhombise isibindi nokuzinikela emdlalweni weHighlands kodwa ufuna kube yibona (abadlali) abalungisa amaphutha abawenze kwiHighlands ngeChippa.
“Umdlalo wethu neHighlands ubuseqophelweni eliphezulu futhi besingawunqoba. Inkinga senze inqwaba yamaphutha angamukelekile. Kasizange simake kahle, besixega sabanika amagoli alula. Kodwa-ke konke ngikushiyela kubadlali manje yibona okufanele balungise la maphutha abawenzile.
“Kuzofanele bakuqinisekise ukuthi kulo mdlalo weChippa kabawaphindi. Nayo kakufanele siyithathe kancane ngoba nakhu isemsileni we- log kodwa kufanele siyinike indawo yayo,” kusho uSredojevic.
UJoel Masutha obambe izintambo zokuqeqesha kwiChippa, uthi bangayimangaza iBucs. IChippa iya kulo mdlalo nje, iguqiswe yiBloemfontein Celtic ngo-1-0 ngoLwesihlanu ebusuku eSisa Dukashe Stadium, eBhayi.
“Inkinga esinayo yiphambi kwamapali, igoli liyanqaba, kalifuni ukungena. Umdlalo weCeltic besiwuthwele yigoli nje elingavumi. Kodwa-ke sizamile ejimini ukuyilungisa le nkinga. Ngethemba ukuthi sizoya kulo mdlalo wePirates sehluke kakhulu,” kusho uMasutha okuvela ukuthi angase axoshwe uma engaphinda ehlulwe kulo mdlalo weBucs.