UPITSO UPHITHENE IKHANDA NGO-ANTHONY LAFFOR
UPHITHENE ikhanda ngesinqumo okufanele asenze ngomdlali wakhe omqoka ophelelwa yinkontileka uPitso “Jingles” Mosimane ongumqeqeshi weMamelodi Sundowns.
IDowns iwuvule kahle unyaka iguqisa iKaizer Chiefs ngo-2-1 kowe-Absa Premiership ngoMgqibelo ntambama eFNB Stadium, eSoweto. Amagoli eDowns avalelwe enethini ngu-Anthony Laffor noLebohang Maboe, eleChiefs lashaywa nguWillard Katsande.
ULaffor (33) ushaya leli goli nje, usematheni kulezi zinsuku njengoba inkontileka yakhe neDowns iphela uma kusongwa isizini. Njengoba kuvulwe iwindi nje, usenalo ilungelo lokusayina inkontileka yesethembiso nanoma iyiphi ikilabhu emfunayo. Umataniswa nayo iChiefs okuthiwa imhalela kabi kabi.
UMosimane uthi indaba kaLaffor imphithanisela ikhanda yingakho engafuni ukuyixhamazelela.
“Siyazi ukuthi yini uLaffor akwazi ukuyenza ngakho-ke kangifuni ukuyixhamazelela indaba yakhe ngoba ingiphithanisela ikhanda. Okwamanje kasikanqumi ukuthi sizomisa kanjani ngaye. Kuningi okukhulunywayo ngaye kodwa kangifuni ukukufaka ekhanda ngoba usengumdlali wethu,” kusho uMosimane.
Ephawula ngomdlalo, uthe luqale lwabadida uhlelo lokudlala obelusetshenziswa ngumqeqeshi weChiefs, u-Ernst Middendorp.
“Ngesiwombe sokuqala usidide wasiqeda. Wenze sangakwazi ukudlala ngoba abadlali bakhe basezimpondweni emuva bebesingenela ngendlela esingayiqondi.
"Ngesiwombe sesibili silungise yonke into, konke kwahamba ngokohlelo. Usenze saphefumula ekhipha uWalusimbi (Godfrey). Sibe nenhlanhla nangegoli esinqobe ngalo, unozinti wabo usiphile.
"Kodwa-ke ngijabule ngalo mphumela,” kusho uMosimane.