UKHALA NGOKULANDELWA NGAMASHWA UNOZINTI WE-KAIZER CHIEFS
UKHALA ngokulandelwa ngamashwa u-Itumeleng Khune ongukaputeni nesithandwa sabalandeli beKaizer Chiefs okuvela ukuthi ngeke esabonakala ngale sizini ngenxa yokulimala.
IChiefs ihlulwe yiMamelodi Sundowns ngo-2-1 kowe-Absa Premiership ngoMgqibelo ntambama eFNB Stadium, eSoweto. UKhune ongunozinti weChiefs, akazange awugijime lo mdlalo emuva kokuba elimale ihlombe ngoLwesine olwedlule ejimini.
Kubikwa ukuthi ngendlela alimale ngayo, kuphoqelekile ukuthi ayohlinzwa. Kuvela ukuthi uzohlala isizini yonke engadlali ukuze aphole kahle.
Lo nozinti obehleli endaweni yezicukuthwane ezakhe zihlulwa yiDowns, ukhala ngokulandelwa ngamashwa selokhu kuqale isizini.
“Le sizini kayingiphethe neze kahle. Ngiyangena ngiyaphuma ngenxa yakho ukulimala. Lokhu okwamanje kungizwisa ubuhlungu ngoba ngizohlala isikhathi eside ngingadlali. Ngiyasola likhona leli bhadi elingilandelayo,” kusho uKhune.
Isikhala sikaKhune sibonakele kulo mdlalo weSundowns kwazise ukuhlulwa kweChiefs kube yiphutha eliwubungane elenziwe nguVirgil Vries obesezintini. Weqiwe yibhola obekufanele alibambe kalula. Leli bhola belijahwa nguLebohang Maboe olifice engamakwe muntu walibeka enethini. UKhune ubonakale ebhocobala esula ubuso kucaca nje ukuthi akajabulile neze.
U-Ernst Middendorp ongumqeqeshi weChiefs, ukuqinisekisile ukuthi uKhune ngeke esabonakala kule sizini ngenxa yalokhu kulimala.