LUNGA SOKHELA
NGIFISA ukuqala ingosi yanamuhla ngokufisela wonke umndeni wamaZulu FC unyaka omusha omuhle, onezibusiso nakinina nonke bafundi bayo nemindeni yenu.
Phezu kwabo bonke ubunzima esihlangabezane nabo ngonyaka odlule, kuyajabulisa ukuthi sikwazile ukubhekana nabo (ubunzima) ngempumelelo ngokusebenza siwumndeni kusuka kubadlali, abalandeli nabaphathi boSuthu.
Silwela ukugcina igama loSuthu liphezulu ngokwenza kahle kuyona yonke imiqhudelwano edlalelwa kwiPSL.
Okuhle nakakhulu wukuthi kangidingi nokuthi yedluliswe ngabanye abantu imizwa yami kubalandeli kwazise le ngosi iyangisiza ukuzikhulumela nabo ngqo.
Phela abantu bayathanda ukuphica inkulumo ngenhloso yokusehlukanisa, singabi wumndeni woSuthu ohlangene, onamandla.
Ngiyazi ukuthi kabasoze baphumelela ngoba iminyango ihlale ivuliwe kwabafuna ukuxhumana nehhovisi ngokuthile.
Nonyaka sihlose ukulwela iNedbank Cup nokuqeda kwi- top 8 kwiAbsa Premiership ukuze sizodlala iMTN8 ngesizini ezayo.
Nginethemba lokuthi ngesizini ezayo sizokwazi ukulwela ukunqoba iMTN8, iTelkom Knockout neligi. Ngiyazi ukuthi kunabantu abangakuthandi ukuzwa ngezinhloso ezi-nhle zalolu hlobo uma zenziwa esidlangaleni.
Phela thina siyikilabhu enomlando onothile, yingakho sifuna ukubuyisela ikilabhu endaweni eyifanele ebholeni lakuleli.
Sethemba ukuthi nizoqhubeka nokuseseka, nibe yingxenye yalolu hambo olumqoka esikulona.
Ngifisa nokubona abalandeli bethu bevula amaziko angu-10 aphapheme kakhulu nonyaka, azosiza ukunyusa isibalo sabalandeli abahambela imidlalo yethu.
Kumele aphathwe ngokuhlelekile njengoba ezobuye alekelele ekugcineni ukuxhumana okuhle nabaphathi.
Sihlela ukubiza ukhukhulelangoqo womhlangano wabalandeli maduzane ukuhlahla indlela ebheke phambili esifisa ukuba sisebenzisane ngayo nonyaka.
Ukuvuleka kwewindi
Kasinazinhloso zokusayinisa abadlali abasha njengoba kuvuleke iwindi kwazise seneme ngesinabo okwamanje.
Sesihlelela ukuphela kwesizini, lapho sizoqala khona sesilungiselela entsha.
Mhlawumbe okungenzeka kungaba wukwenyusela esikwatini esikhulu umdlali noma ababili abagijima eqenjini lethu leMDC.
Simfisela okuhle uMabhuti
Kube buhlungu ukuhlukana noMabhuti Khenyeza osebeke ethala amakhokho okudlala njengoba esejoyine iMaritzburg United njengephini lomqeqeshi. Lesi sinqumo kasibanga lula.
UMabhuti ubemqoka ekilabhini ngaphakathi nangaphandle kwenkundla. Kumqoka ukusho ukuthi wangazisa kuqala isizini ngesifiso sakhe sokungena ekuqeqesheni. Samncenga ukudlala omunye unyaka kwazise ngaleso sikhathi besibudinga ubuholi bakhe kubadlali abasakhula.
Nokho ngokuqala kwesizini sisayinise uMarc van Heerden, uMoeneeb Josephs noNhlanhla Vilakazi abaqine ukhakhayi. Laba badlali bandise isipiliyoni esivele sinaso kuSiyabonga Nomvethe, uMichael Morton naku-Energy Murambandoro okwenza sikholwe wukuthi sesinabadlali abaningana abangabaholi futhi abanesipiliyoni. Yingakho sinqume ukumvumela uMabhuti ukuba ahambe, sethemba ukuthi siyobuye sisebenzisane ngokuzayo.
Imidlalo emibili yasekhaya
Sinemidlalo emibili yasekhaya ebucayi esizoyidlala neHighlands Park ngoMgqibelo ngo-20h15 kanjalo noweKaizer Chiefs ngoLwesibili lomhla ka-15 ngo-19h30 eMla- zi. Yize le midlalo inzima kodwa kusiqinisa idolo ukwazi ukuthi sizokuya kuyona nerekhodi lokungehlulwa ekhaya esifuna ukuligcina.
Sihlose amaphuzu angu-6 kule midlalo ukuqinisa indlela yethu ebheke kwi- top 8.
Ngiyazi ukuthi uMasingana (January) uthwalisana kanzima kwezomnotho kodwa ngiyabanxusa abalandeli bethu ukufika ngobuningi kuwona bazoseseka ukugcina iKing Zwelithini Stadium kuyinkundla okungayi lubuyayo kuyona.
Iqembu lethu leMDC
Iqembu lethu leMDC lenza kahle kakhulu kule sizini njengoba lisele ngamaphuzu angu-5 kweliqhwakele. NgeSonto elizayo lizodlala neBloemfontein Celtic Reserves eMlazi kanti ukunqoba lo mdlalo kumqoka kakhulu, okwenza sinxuse abalandeli ukufika ngobuningi kuwona.
Okuhle wukuthi kungenwa mahhala kuwona. Ukwenza kahle kwiMDC kuyinkomba yokukhanya kwekusasa lekilabhu njengoba kudlala injejane khona.
U-Ayanda Dlamini ongumqeqeshi weMDC yethu wenza kahle kakhulu kwazise umdlali omdala kulesi sikwati uneminyaka engu-22 ubudala ekubeni amanye amakilabhu asebenzisa nabadlali asebekhulile.
Abadlali bethu abancane bakhombisa isibindi esikhulu nokungesabi okuyinto esiyigqugquzelayo njengabaphathi.
Imiphumela kamatikuletsheni
Kungijabulise kakhulu ukuphumelela kwabadlali bethu abangu-6 abebefunda eGlenwood High School nas’Ohlange Academy ngokwahlukana. Kuyinhloso yethu ukugqugquzela imfundo kubadlali kwazise iyisikhali esimqoka uma umdlali esebeka amakhokho ethala.
Ngihlale ngikugcizelela ukuthi ukuziphatha kahle okudingeka kwamatikuletsheni kufana ncimishi nokudingeka kumdlali ebholeni elikhokhelayo. Sethemba ukuthi nabalandelayo bazosika iphethini kubona.
Izilokotho ezinhle kubalandeli abazalwayo
Sifisela usuku oluhle lokuzalwa u-Ayanda “Mehlemamba” Ntuli ozalwa ngoMgqibelo. Lena sekuzokuba yingxenyana entsha engosini yami.
Ngizohalalisela abalandeli bethu abazalwayo. Kuzomele baxhumane nosihlalo wabalandeli nxa usuku selusondele ukuze sikwazi ukudlulisa izilokotho nakubona! Hebe! Usuthu!