ISIKHULU SE-BAROKA SINGASE SIJOYINE I-CHIPPA UNITED
ISHIYWA yisikhulu esimqoka iBaroka FC okuvela ukuthi seshelwa ngenhle imali yiChippa United abagijima nayo kwi-Absa Premiership.
ILANGA lithole ngemithombo yalo engashayi eceleni ukuthi uMorgan Mammila oyisikhulu esiphezulu seBaroka FC, ufake incwadi yokwesula kule kilabhu kaKhurishi Mphahlele. Kuthiwa uvume umsebenzi wokuyoba yisikhulu esiphezulu kwiChippa kaSiviwe “Chippa” Mpengesi okuthiwa simapeketwane isimo kuyona emuva kokuba kushiye uPeter Koutroulis obeyimenenja jikelele.
Kuthiwa into eyenze lesi sikhulu savuma lo msebenzi weChippa yize isengcupheni yokugencwa yizembe, wukuthi uMpengesi usithembise umholo oconsisa amathe. Kuvela nokuthi uMammila ubesecikwa nangokuthile kwiBaroka.
“UMammila uyashiya kwiBaroka, kangiboni kuphela leli sonto esekuyona ngoba incwadi yokwesula uyifake ngeSonto (izolo) ntambama emuva komdlalo weBaroka neBlack Leopards obuyizolo ePeter Mokaba Stadium. Ngabe kudala ayifaka incwadi into ebimbambile wukuthi kunomdlali waseZimbabwe abesazama ukumsayinisa kwazise akekho kwiBaroka onolwazi lokusayinisa umdlali wangaphandle, ubeqedela lokho.
“UMpengesi kudala aqala ukumeshela. Ufuna azomlungisela izinto ekilabhini yakhe ngoba zimapeketwane. Ubejijinyezwa nanguSARS yingakho efuna uMammila azomqondisela wonke amabhuku emali,” kusho umthombo waleli phephandaba osondelene kakhulu noMammila.
Imizamo yokuthola uMammila ukuba aphawule ngalolu daba iphunzile njengoba ucingo lwakhe belukhala kodwa lungabanjwa.
OlukaMpengesi lona beluvaliwe.