Injabulo ngendodana esingudokotela
Unina ubesebenza emgwaqweni ehola u-R510 ngenyanga
AKAKHOLWA ukuthi ivundle kwesakhe isisu - ngenxa yenjabulo - indodana yakhe engudokotela eqale ukusebenza esibhedlela iR K Khan, eChatsworth, kule nyanga, owesifazane waseMid-Illovo, othi uthwale kanzima ekhulisa izingane zakhe.
UNkk Bahlomile Mngadi, ongunina kaDkt Nhlanhla Mngadi (26), uthi ngathi uyaphupha uma indodana yakhe, eyenza i- community service eR K Khan, isibizwa ngodokotela.
Uma eseqede iminyaka emibili enza i- community service, uyobe esengudokotela ngokugcwele.
Ekhuluma neLANGA, uNkk Mngadi, uthi kuze kube yimanje kuvele kube sengathi akakhulumi ngengane evundle esiswini sakhe uma ekhuluma ngoDkt Mngadi, ngoba ethi ibe yinde kakhulu indlela eya empumelelweni, kusukela ngesikhathi umntanakhe kufanele afulathele iNingizimu Afrika, aye eCuba ukuyofundela ubudokotela ngaphansi kohlelo lomnyango wezempilo.
“UNhlanhla uyingane ezithulelayo nje, okuthi noma kukhona okungalungile, angasho. Ethula enjalo-ke, ubevele engumntwana okhaliphile ngisho esakhula, kodwa uthe uma eqeda ukufunda umatikuletsheni, wabe esebhalisela ukuyofundela ubuthishela e-Edgewood Campus, eNyuvesi yaKwaZulu-Natal.
Uthe esezoqala nje, watshelwa ukuthi uthole umfundaze wokuyofundela ubudokotela phesheya kwezilwandle,” kusho uNkk Mngadi.
Uthi ufikelwa yizinyembezi uma ekhumbula ukuthi indodana yakhe ngesikhathi imtshela lezi zindaba, ubesebenza emgwaqweni ehola u-R510 ngenyanga, kuphilwa kanzima kwakhe.
“Ngavele ngakhihla isililo ngingazi noma ngesokujabula noma ngesokwesaba ukuthi kazi indodana yami iyobuya ngisaphila yini khona lapho emazweni nami engingawazi.
"Kwakufana nephupho nje, kanti namanje njengoba esebuyile ngiyesaba ngoba phela nasendaweni sekudume ukuthi nginomuthi ngoba kungangifanele ukuba nengane efundile,” kusho yena.
Uthi uzizwa engowesifazane obusisekile ngempela.
"Ngiyabonga kubona bonke abantwana bami ngokungeseka nangemuva kokudlula emhlabeni kukayise ngo-2001. Ngiyethemba ukuthi nabafowabo nodadewabo bayaziqhenya kakhulu ngaye uNhlanhla,” kusho yena.
UDkt Mngadi uthi isifiso sakhe esikhulu wukwakhela unina umuzi, kuthi uKhisimusi ozayo bawudlele kulowo muzi. Ekhuluma ngemuva kokuvakashelwa nguNgqongqoshe wezeMpilo KwaZulu-Natal, uDkt Sibongiseni Dhlomo, uveze ukuthi isimo sakubo ebesingesihle, yisona esenze wasebenza ngokukhulu ukuzinikela.
Ekhuluma osukwini lwakhe lokuqala emsebenzini uDkt Mngadi, uthe uswele amagama okuchaza ukuthi uzizwa kanjani.
“Ngijabule kakhulu futhi ngina- kho nokwesaba ngoba phela ukuba ngumfundi kakufani nokuba ube ngudokotela usebenze nabantu.
"Ngiyethemba kodwa ukuthi konke lokho kuzodlula,” kusho yena.
Ubonge kakhulu ngalolu hlelo olumnike ithuba abengasoze wakwazi ukulithola.
“Ngesikhathi ngifulathela elakuleli ngo-2011, ngangingazazi izingqinamba ebengizobhekana nazo, kodwa ngiyajabula ukuthi namhlanje ngilapho ngikhona. Kungijabulisa kakhulu ukuba ngikwazi ukubuyisela emphakathini ngokuba ngisebenzele wona manje,” kusho yena.
Uthi iphupho lakhe elikhulu wukushintsha impilo yomndeni wakhe. Kuzokhumbuleka ukuthi lolu hlelo lokusebenzisana kweNingizimu Afrika neCuba - ukuba iCuba iqeqeshe intsha yakuleli ekubeni ngodokotela - luqale ngo1997.
Lwakhiwe emuva kwesivumelwano esenziwe nguMnu Nelson Mandela noMnu Fidel Castro owayengumengameli waseCuba - bobabili asebalala kobandayo. Bawu-127 odokotela asebefunde baqeda ngaphansi kwalolu hlelo, abawu-438 abasafunda, kanti abawu-291 bakuleli abaqedela izifundo zabo.