KUMUNCU ESIKOLENI UTHISHA EMUKA NGEMOTO NEZISEBENZI
SIVULE ngezindaba ezimbi ngoLwesibili isikole sodumo, lokuphasa ngamale-ngiso, iBizimali High School, eNkandla, kumuka nomfula uthisha wakhona nezisebenzi ezintathu zesikole eMabomvini, eMsinga bebuyela esikoleni.
Ngokuthola kweLANGA, imoto imuke emfuleni iNadi - obudla izindwani - bashona bonke abebephakathi, emuva kokuba umshayeli ezame ukuyiwelisa kanti izophenduka ibheke phezulu.
Umthombo weLANGA obukhona kwenzeka lesi sigameko, uthi beziningi izimoto zilinde ukuba umfula ubohle, kodwa le veni eshone nabantu, yangena khona kunjalo.
“Ngisola ukuthi imoto uyifake emanzini ngoba ebona ukuthi iphakeme. Bashone kabuhlungu ngoba kuze kwafika umphakathi wazama ukubatakula ngoba amaphoyisa abengafiki,” kusho umthombo.
Kuthiwa uthisha oshonile, nguNkz Sisanda Dlomo obefundisa i-Accounting kwaGrade 10 kuya kwa-12 kanti ngokokudabu- ka ngowaKwaNdengezi, eThekwini. Abanye abashonile nguMnu Mthobisi Zondo obeyimenenja yezindawo ezihlala abafundi esikoleni, kube ngomunye wesilisa nowesifazane bonke abasebenza khona.
Omunye uthisha waseBizimali, uthe lo thisha ubecele ukugibela kulaba ngoba bedibane eGreytown kade beyothenga ukudla kwezingane ezihlala ngaphakathi esikoleni.
“Isimo simuncu esikoleni, kangilazi ibhadi elinje. Silinyalelwe uthisha obehlakaniphile kakhulu, kanti nalaba abehamba nabo bebenothando olumangalisayo,” kusho lo thisha.
Okhulumela uMnyango wezeMfundo KwaZulu-Natal, uMnu Scelo Khuzwayo, uthe bazwelana kakhulu nemindeni nezihlobo zabadlulile emhlabeni.
“Kuyishwa ukuthi unyaka siwuqale ngezindaba ezibuhlungu ekubeni kade sisebenze kahle kanjena kumatikuletsheni. Sithi umndeni kathisha awuqine idolo nabo bonke ozakwabo esikoleni.
"Siyafisa ukuba umphakathi usikhulekise kulezi zimo zendalo ngoba ukulahlekelwa nguthisha kunzima kakhulu,” kusho uMnu Khuzwayo.
Okhulumela amaphoyisa KwaZulu-Natal, uCapt Nqobile Gwala, usiqinisekisile isigameko wathi amaphoyisa asaphenya ngokwenzekile.