Simvulele amathuba amakhulu isici sakhe
Uyimodeli yemikhiqizo ehamba phambili
UKUZAMUKELA yena uqobo, uSlindile “Slienky” Ngema (28) waseShowe, omodelayo, uthi kumlekelele kakhulu ekubeni azithande yize ekhule egconwa ngebala lesikhumba sakhe esimnyama kakhulu kunokujwayelekile. Le ntokazi engumkhangisi wengqephu yenze izikhangiso ngemikhiqizo eyahlukene okubalwa kuyona neyesikhumba. Ngaphandle kwalokho, ineziqu ze-Interior Designing nezeArchitecture and Technology, ezenze iminyaka ilandelana eDurban University of Technology (DUT). “Ngiqale ngenza izifundo zeJewellery Design ngoba ngingumuntu othanda izinto zakwaarts. Ngiwufundile unyaka wokuqala khona eDUT, okuthe uphela ngabona ukuthi kangiwuthandisisi kahle lo mkhakha ebengingene kuwona. “Ngiqale phansi ngafunda i-Interior Designing iminyaka emithathu, okuthe uma ngiqeda ngenza iziqu zeArchitecture and Technology eminye iminyaka emithathu ngoba ngibonile ukuthi kuyahambisana futhi bengisafuna ukuqhubeka ngifunde,” kusho le ntokazi. Ithi yilapho iqale khona ukusetshenziswa ngezinye izitshudeni, ziyithwebula noma zicela ukuthi ibe yimodeli yazo. “Ngiqale lapho-ke ukubona ukuthi ngingangena emkhakheni wezokumodela ngoba bebethatha izithombe ezinhle, bengincoma bethi bathanda nebala lami,” kusho yena.
Ukuba yimodeli kukaSlienky kakuyona-ke into akhule ezitshela ukuthi angayenza, kwazise ukhule egconwa ngezinye izingane, ebizwa ngamagama abekhombisa ukumcwasa ngoba nakhu emnyama kakhulu.
“Ngingasho nje ukuthi uthando engiluthole ekhaya ngesikhathi ngikhula, yilo olungenze ngaba nokuzethemba sengikhulile. Ekhaya bengibizwa ngamagama amnandi, kubalwa nelendoni yamanzi,” kusho yena.
Uthi lokhu kumgqugquzelile ekubeni azifundise ukuthi kubalulekile ukuzithanda naye uqobo aphinde azamukele. Eminyakeni embalwa edlule ufulathele iTheku walibangisa eGoli ukuyobheka amadlelo aluhlaza lapho esebenza khona.
“Ngithe ngingazelele nje ngisendaweni yokudla, kwakhona owesilisa thizeni oze kimina wathi uyalithanda ibala lami, ngingakwazi yini ukusebenza naye. Ngibe sengingena kanjalo-ke emkhakheni wezokukhangisa,” kuchaza yena.
Kuyimanje uqashwe ngokugcwele yi-Onboard Consulting Engineers lapho athi ukwazi ukusebenzisa iziqu zakhe zombili kanti usayinwe njengemodeli ngaphansi kweLampost Productions.
Yize kunjalo, le ntokazi ithi zisekhona izingqinamba ebhekana nazo kulo mkhakha ngoba abanye bayaye bathi isikhumba sayo simnyama kakhulu bathi ezikhangisweni igqiba amanye amamodeli.
“Sengijwayele ukuzwa zonke izinhlobo zezizathu zokuthi kungani ngingasetshenziswa, kodwa lokho kakungidikibalisi futhi nginethemba lokuthi umsebenzi okusuke kufanele kube ngowami usuke uzoba ngowami, kangiqhudelani namuntu,” kusho yena.
Le ntokazi iwubuso beVaseline, isike yaba sesikhangisweni sabakwaMTN, ibingenye yamamodeli akhangisa ngezimpahla kwiRaw Silk, uhlelo obelwethulwa nguPearl Modiadie kwaSABC 1 lwabasiki bengqephu kanti ike yakhangisa nangezimpahla zikaNandi Madida.
“Yize ngibona sengathi iminyaka isiyangishaya, kodwa nginethemba lokuthi azongivulekela amathuba naphesheya kwezilwandle,” kusho yena.
USlienky, abaningi bamfanisa nomculi nomlingisi uGrace Jones waseUSA kodwa owazalelwa eJamaica. Uthi ukufaniswa nalona wesifazane kuyamthobisa.
“Ngangingazi nokuthi ngubani uGrace Jones, okuthe uma abantu belokhu bengifanisa naye, ngaqala ngafunda ngaye. Manje sengivele ngijabule uma abantu bengibona ngidlula bengibiza ngaye noma uma bethi ngifana naye,” kusho le ntokazi.