UZOBA SEMGUNGUNDLOVU UMJAHO WOKUQALA E-KZN
BAZOVULA ngeRonnie Davel 16km Run/Walk abasubathi baKwaZulu-Natal ezokuba ngeSonto kusuka ngo-7 ekuseni eLaddsworth Primary School, eHilton, ngaseMgungundlovu.
Kuzokhumbuleka ukuthi kunomdonsiswano omkhulu phakathi kweKwaZulu-Natal Athletics (KZNA) ne-Athletics South Africa (ASA) njengoba iKZNA ingaphansi komlawuli ozimele namanje ongakaqali ukusebenza kulandela ukugoloza kukaSello Mokoena ongumengameli wesifundazwe ukuphuma ehhovisi njengoba emisiwe nebhodi yakhe yonke.
Abasubathi besifundazwe bebenovalo bengazi noma izokuba khona yini imijaho yabo nonyaka njengoba lolu daba lweKZNA neASA lungakaxazululeki.
UPaul Laing weHilton Harries ehlela lo mjaho, ukuqinisekisile kuleli phephandaba izolo ngoLwesithathu ukuthi umjaho wakhe uzoqhubeka ngeSonto.
“Umjaho uzokuba khona. Bengicela abasubathi ukuba baphelele ngobuningi babo njengoba bebehlale benza kwazise wumjaho wokuqala wonyaka. Sizoqala ukwamukela imingenelo ngoMgqibelo emini nangeSonto ekuseni ngaphambi komjaho esikoleni eLaddsworth Primary,” kusho uLaing.
Abafuna ukuba yingxenye yalo mjaho bangaxhumana noLaing kwethi: 082 491 3194. I-KZNA ikuqinisekisile kuleli phephandaba ukuthi umjaho ukhona.
Kusenjalo, uMengameli wezwe uCyril Ramaphosa uzokuba yingxenye ye-5km walk ezokuba namuhla ngoLwesine kusuka ngo-6 ekuseni edolobheni laseMgungundlovu.
Lo mjaho uhlelwe wumnyango wezemidlalo wesifundazwe oholwa nguBongi Sithole-Moloi ngenhloso yokugqugquzela umphakathi ukuba uzivocavoce ukuze uhlale uyimiqemane.
UBongi naye uzokube eyingxenye yalo mjaho nongqongqoshe wezemidlalo kazwelonke uThokozile Xasa nezinye izikhulu zikahu- lumeni.
UBongi uthe: “Ngijabule kakhulu ukuthi umengameli uzokuba yingxenye yalo mjaho yize ezokube enesikhathi esincane njengoba ematasatasa nezinhlelo zengqungquthela ye-ANC ezokuba ngempelasonto eMoses Mabhida Stadium.
"Simema wonke umphakathi waseMgungundlovu nezindawo ezakhelene nawo ukuba babambe iqhaza kulolu hambo. Ukuzivocavoca kwenza umuntu ahlale ewumqemane.”