IChiefs izama ukuvala esikaKhune
IKAIZER Chiefs izama ukusayinisa kabusha uThela Ngobeni ongunozinti emchithe emuva kokuba esehlale iminyaka kuyona engadlali.
IChiefs ibhekene nenkinga emapalini njengoba unozinti wayo u-Itumeleng Khune elimele ihlombe.
Kulindeleke ukuba ahlale isizini yonke engadlali.
Ezintini kuvimba uVirgil Vries osephenduke isitha sabalandeli emuva kokuba enze iphutha eliwubungane eliholele ekutheni iChiefs ihlulwe yiMamelodi Sundowns ngo-2-1 koweligi ngeledlule.
Omunye unozinti okhona nguBruce Bvuma ongenaso isipiliyoni. ILANGA lithole ngemithombo yalo ukuthi iChiefs ishaya indesheni kwiSundowns ukuba ibadedelele uNgobeni ongunozinti wayo ongavimbi. UNgobeni ujoyine iDowns kumasizini ambalwa edlule emuva kokuba iChiefs imchithile. Umthombo uthe: “IChiefs ishaya indesheni kwiDowns. Ifuna uNgobeni ukuze ivale ngaye isikhala sikaKhune. Nokho kubukeka kuzokuba nzima ukuthi imthole ngoba uNgobeni uyazi ukuthi uma kuke kwabuya uKhune uzophinde ahlaliswe ngaphandle. "Ufuna ukuya lapho ezodlala khona. “Kunekilabhu yaKwaZulu-Natal nayo emfunayo, kungenzeka agcine elibangise kuyona ngoba nayo inenkinga yonozinti, futhi-ke uzimisele ngokuyijoyina ngoba ubona ezokuba nethuba elingcono lokudlala kuyona.” UVina Maphosa wezokuxhumana kwiChiefs ebuzwa ngalolu daba, uthe ngeke akwazi ukuphawula ngalo. Uzeseke ngokuthi bamatasa balungiselela umdlalo wabo weligi abawugijime neBidvest Wits izolo ngoLwesithathu ebusuku eBidvest Stadium, eGoli.
Imizamo yokuthola uThulani “TT” Thuswa wezokuxhumana kwiSundowns iphunzile njengoba ucingo lwakhe beluvaliwe.
Izinsuku nezinkundla zemidlalo yeNedbank Cup last 32 zimi kanje:
NGOLWESITHATHU mhla ka-23 kwephezulu. EBidvest: Wits vs Boyne Tigers 19h30. E-Old Peter Mokaba: Polokwane City vs Tshakhuma Tsha Madzivhandila 19h30. NGOLWESIHLANU mhla ka-25 kwephezulu E-Athlone: Cape Umoya vs Tshwane University of Technology 15h00.
EKing Zwelithini: AmaZulu vs Highlands Park 20h00. NGOMGQIBELO mhla ka-26 kwephezulu ESugar Ray Xulu: UMvoti FC vs TS Galaxy 15h00.
ENelson Mandela Bay: Chippa United vs Mamelodi Sundowns 15h00.
EGoble Park: Free State Stars vs Richards Bay FC 15h00.
EThohoyandou: Black Leopards vs Orlando Pirates 18h00.
ECape Town: Cape Town City vs SuperSport United 20h15.
Kanyamazane: Tjakstad JS vs Golden Arrows 20h15. NGESONTO mhla ka-27 kwephezulu EGoble Park: Super Eagles vs Bloemfontein Celtic 15h00.
EPuma Rugby: Witbank Spurs vs Maritzburg United 15h00.
Kanyamazane: Mbombela United vs NC Professionals 15h00.
ESisa Dukashe: Tornado FC vs Kaizer Chiefs 15h00. NGOLWESIBILI mhla ka-29 kuMasingana: EDobsonville: Maccabi FC vs The Magic FC 19h30.
EPeter Mokaba: Baroka vs Cosmos 19h30.