USUTHU NENKINGA YOKULIMALA KWABADLALI

UGQEMEKE ingozi uCavin Johnson ( osesithombeni) ongumqeqeshi wamaZulu FC njengoba ezoya emdlalweni omqoka ngaphandle kwabadlali bakhe abawumgogodla.

USuthu luzobhekana neHighlands Park koweAbsa Premiership ngoMgqibelo ngo-20h15 eKing Zwelithini Stadium, eMlazi. USuthu luwuvule kabi unyaka luhlulwa yiPolokwane City ngo-3-2 koweligi ngeledlule ePeter Mokaba Stadium, ePolokwane.

UJohnson ukhala uyazithulisa njengoba ethi uzoya kulo mdlalo weHighlands ngaphandle kwabadlali abamqoka, uPhumlani Gumede odlala emuva odonsa isigwebo samakhadi amane aphuzi noButholezwe Ncube odlala esiswini olimale emdlalweni wePolokwane.

U-Emiliano Tade ongumgadli akazange ajime izolo ngoLwesithathu ekuseni ngenxa yokuthi kwayena ubuya ekulimaleni. Nokho kuthiwa abaqeqeshi bebemonga.

“Unyaka siwuvule kabi kodwa ngikholwa wukuthi sizenze thina ngoba sivuzise amagoli alula. Lona ngumdlalo wethu wokuqala ekhaya kulo nyaka, noma kanjani kufanele siwunqobe. Siyazi ukuthi bazoza ngamandla ngoba sibehlulile ekuhambeni. Okusifaka umfutho wukuthi kasikaze sehlulwe eKing Zwelithini.

“Ngibuhlungu njengoba bengekho laba badlali, uma sesibheke entanjeni usuke usudinga bonke abadlali bakho bephelele. Kodwa-ke bakhona abanye, kuzofanele balisebenzise ithuba engizobanika lona. UTade akajimanga ngoba sizama ukumonga njengoba ebuya ekulimaleni. Ngethemba ukuthi kuzosisebenzela lokho,” kusho uJohnson.

U-Owen da Gama ololonga iHighlands, uthi AmaZulu kuzofanele asebenze uma kuwukuthi afuna ukubehlula.

“Lo mdlalo uzoba mnandi lokho kangikungabazi ngoba womabili amakilabhu anabadlali abasebancane futhi abanomfutho. Okwenzeke emzuliswaneni wokuqala besehlula ekhaya sidlulile kukhona ngoba besisazifikela nathi sisahlanganisa izinto.

Kodwake sibabonile

behlulwa yiPolokwane kunezindawo ababuthaka kuzona esizongena ngazo. Kunabadlali nje engimincile ukuthi bababophele kulo mdlalo engingangabazi ukuthi yibona abazokwenza sinqobe. Kuzofanele basebenze ngokwengeziwe uma befuna ukusehlula. Irekhodi labo lasekhaya alisho lutho, thina sizokwenza umsebenzi esiwaziyo nje kwaphela,” kusho uDa Gama. Isiyonke imidlalo yeligi imi kanje:NGOMGQIBELO EThohoyandou Stadium: Black Leopards vs SuperSport United 15h30 (SS10).

ECape Town Stadium: Cape Town City FC vs Baroka FC 20h15 (SS4).

EKing Zwelithini Stadium: AmaZulu FC vs Highlands Park 20h15 (SABC1). NGESONTO EDr Molemela Stadium: Bloemfontein Celtic vs Golden Arrows 15h30 (SS4 nakwiSABC1).