UMFUNDI USWELE IMALI YASENYUVESI
UNTULA imali yokubhalisa enyuvesi umfundi ophase kahle umatikuletsheni, eNkosi uMdibaniso Comprehensive High School, eHighflats, ngenxa yokuthi umzali wakhe akanayo, kwazise kwamsebenzi awenzayo wokusika utshani emigwaqweni, kawungenisi mali etheni.
UNkk Nompumelelo Xaba waseNdwebu, eHighflats, uthi akazi uzothathani ahlanganise nani njengoba indodana yakhe, uMluleki Xaba (18),( osesithombeni) imukeliwe e-University of KwaZulu-Natal (UKZN), emkhakheni wezobunjiniyela.
Uthi imali yokubhalisa isihlangene neyokubhalisela indawo yokuhlala ngaphakathi enyuvesi, iwu-R6 500, akanayo. “Imali engiyiholayo emgwaqweni incane kakhulu ngoba siholelwa u-R700 ngenyanga njengoba sihlanza umgwaqo.
" Benginesifiso sokubeka imali nyakenye ukuze ingane iqede umatikuletsheni esekhona amasentshana, kodwa isimo kasingivumelanga ngenxa yokweswela, kwazise bengilekelela nenye ingane yami efunda e-Unisa.
"Ngiyafisa ukuthola usizo ukuze ingane yami iqhubeke nemfundo ephakeme,” kusho uNkk Xaba. Uthi nakuba kade enalo ulwazi ukuthi indodana yakhe izophasa kahle, kodwa ubengeke akwazi ukuqongelela imali.
Utshele ILANGA ukuthi banethemba lokuthi impilo yomndeni izoshintsha ngokuphumelela kwalo mfundi ezifisweni zakhe.
“Ukuphasa kahle kwakhe kumatikuletsheni, kunginikeza ithemba lokuthi ngisho enyuvesi uzosebenza ngokuzimisela abuye alekelele umndeni,” kusho uNkk Xaba.
UMluleki uthole o-A abawu-4 okubalwa okungowePhysical Sciences (92%), IsiZulu (80%, iLife Orientation (96%) ne-Engineering Graphics and Design (81%) kanti o-B bathathu owe-Electrical Technology (77%), owe-English (75%) neMathematics (78%).
UMluleki uthi ubesifakile isicelo sokuxhaswa ngemali kwaNational Student Financial Aid Scheme (NSFAS) kodwa wangaphendulwa.