Iyingozi ngokweqile le ngcindezi ebhekana nabesifazane
Bangazithola sebebulala ngisho izingane zabo uma isibahlasele
INGCINDEZI ehlasela abesifazane ngemuva kokubeletha, ebizwa ngePostpurtum Depression (ppd) noma yiPostnatal depression, ikhona futhi iyingozi ngendlela eyisimanga uma ingelashwa.
Lokhu kushiwo ngudokotela wengqondo, uDkt Nozibusiso Nyawose, osebenza kwa-Prasa. Uthi le nkinga ikhona futhi kudala yabakhona, yikhona nje ukuthi ivela kakhulu manje, kodwa nakhona abantu abaningi basehluleka wukufuna usizo uma bebona ukuthi banayo.
ILANGA selibike kaningana ngabesifazane ababulala izingane zabo zisencane, okuyaye kushiye imibuzo ukuthi ngoba nokukhipha isisu sekusemthethweni nje, kungani laba bengavele bazikhiphe izisu uma bengafuni ukuba nezingane kunokuba bazibulale.
Udaba oluhlasimulise umzimba, esisanda kulushicilela, ngolowesifazane waseGeorgedale, eHammarsdale, okubikwe ukuthi ubelethe amawele maqede wawalahla ehlathini eliseduze kwakubo ngoNcibijane.
Elinye iphahla lize latholwa ngomunye womakhelwane elizwe likhala kulona leli hlathi ngesikhathi egeza. Elinye belingakatholakali, kodwa kunezinsolo zokuthi kungenzeka lidliwe yizinja noma kukhona lapho eligqibe khona.
Lona leli phephandaba like labika ngasekupheleni konyaka odlule, ngowesifazane okuthiwa uphihlize ingane yakhe enezinyanga ezintathu etsheni ethi yinyoka ifuna ukumbulala. Uyibulale wayigqiba, esathi ugqiba yona inyoka leyo.
Kunodaba olunyakazise iNingizimu Afrika yonkana lowesifazane waseMpumalanga, uNkz Zinhle Maditla (24), ozinikele emaphoyiseni ngemuva kokubulala izingane zakhe ezine, okunguMinenhle (8), uBlessing (7), uShaniqua (3) no-Ethen obenezinyanga eziwu-11.
UMnu William Shongwe onguyise wezinye zezingane ezibulawe nguNkz Maditla, utshele abezindaba ukuthi lona wesifazane ubehlala esabisa ngokuthi izingane uzozibulala.
Ngokusho kukaDkt. Nyawose, lolu hlobo lwengcindezi lujwayele ukuhlasela abesifazane ngemuva kwesikhathi esingamasonto amane bebelethile, kanti uma ingalashiwe kungaphela unyaka wonke lowo wesifazane imbambile.
Uthi kujwayeleke ukuba sihlasele kakhulu abaneminyaka ewu-16 kuya phezulu, kodwa okuqaphelekayo wukuthi sijwayele ukuhlasela abasuke bengakulungele ukuthola izingane.
“Thina bantu abamnyama kakujwayelekile ukuba uma sifuna ukuba nengane sikuhlelele lokho, sikulungele nangokomoya. Ezikhathini eziningi kuba yiphutha nokusho ukuthi sisuke singakulindele ukukhulelwa noma ukuba nengane.
Ziningi nezinye izinto eziholela ekubeni lona wesifazane agcine enengcindezi njengokubalekelwa nguyise wengane, wukungasekwa wumndeni nokunye okuningi,” kusho uDkt Nyawose.
Uthi le ngcindezi kayilawuleki futhi iyingozi kakhulu uma ingelashwanga ngoba ijwayele ukuba imiphumela yayo ibe mibi njengokudlula kwengane emhlabeni.
“Abanye abazali kuthi noma bebona ukuthi banengcindezi, besabe ukucela usizo ngoba kwezinye izikhathi basuke bevele bezibona bengasekwa ngaleso sikhathi,” kusho yena.
Echaza ngembangela yale ngcindezi, uthe: "Kune- chemical ebizwa nge-seratonin okuthi uma ungabhalansile kahle engqondweni, ibe nomthelela omubi kowesifazane osanda kuthola ingane.
"Le khemikhali idala ukujabula kanti uma unengcindezi isuke ingekho noma incane emzimbeni, okukwenza ungakufuni vele ukujabula,” kusho uDkt. Nyawose. UDKT Nyawose uthi ziningi izimpawu okumele ziqashelwe uma owesifazane esanda kubeletha, ikakhulukazi uma kuke kwaba nengcindezi ethile nangesikhathi ekhulelwe, njengokuhlukana noyise wengane, wukuxabana nomndeni ngenxa yokukhulelwa, wukukhulelwa esafunda nokunye.
“Abesifazane abanale nkinga, abaningi kababi nenjabulo yokuthi banengane encane njengoba kwenzeka kwabanye, kunalokho babona sengathi bayehluleka wukuba ngomama noma bakubone kuwumsebenzi onzima kakhulu ukukhulisa ingane.
"Abanye kabafuni ngisho ukuyincelisa ngoba bengafuni ukuba kube nokusondelana okukhona phakathi kwabo nezingane. Lolu wuphawu olujwayelekile ngoba ngesikhathi umama encelisa ingane, babukana emehlweni bathintane, owesifazane onale ngcindezi akafuni kube nalokhu kuxhumana,” kuchaza yena.
Uqhuba athi abanye bavele balokhu bephatheke kabi nje, kube kungaqondakali ukuthi yini lena ebaphatha kabi. Uthi abanye baba nolaka ngendlela eyisimanga, nakuyona ingane uqobo.
“Omunye uthi uma ecasulwe nguyise wengane, adinelwe nakuyona, kubonakale ukuthi iyamcasula. Lokhu kucasuka angakukhiphela nakubantu aseduze nabo.
"Nakho ukungabi khona kwemali, kuyayidala le ngcindezi, kodwa abantu kabafani kanjalo nezimpawu kazifani. Kwabanye kuvela ezehlukene kunezijwayelekile,” kusho uDkt Nyawose.
Ukucasuka kalula nokucasulwa wubala ngezinye zezimpawu okuthiwa owesifazane onale ngcindezi ubhekana nazo. “Abanye besifazane bakhala into engapheli, abanye kabadli, abanye badle ngokweqile.
"Inkinga yikhona nje ukuthi basuke bengazi ukuthi kwenzekani kubona,” kuqhuba yena. Ngokwabewebsite, i- psycom.net, abaningi uma bebhekene nale ngcindezi basuke bezisola nokuthi kungani bengomama. “Njengomama omusha uzibona uyisehluleki, ngoba usuke uzwa ukuthi kukhona okungahambi kahle futhi ubona nokuthi ingane yakho idinga umama ongcono kunawe.
"Abaningi badliwa wunembeza wokuthi kungani bengakwazi ukusondelana nengane yabo noma bengaluzwa lolu thando abantu abaningi abahlale bekhuluma ngalo,” kusho le website. LOLU hlobo lwengcindezi, uthi kusuke isimo sesisibi kakhulu ngoba lowo onayo, usuke esengazilimaza noma alimaze yona ingane.
“Kunabesifazane abazibulalayo izingane uma sebenale nkinga ngoba isuke isikwelinye izinga nengqondo isinokuphazamiseka, sesingasho nje ukuthi umuntu useyahlanya.
"Abanye bayaye baveze ukuthi kunamazwi akhulumayo emakhanda abo athi mabazibulale noma babulale ingane,” kusho uDkt Nyawose.
Ngokusho kwabe- website, i- postpartum.net, lolu hlobo lwengcindezi kalujwayelekile kwazise luvame ukuhlasela abesifazane ababili kwabawu-1 000.
Okwehlukile ngalo wukuthi lujwayele ukusheshe lubonakale njengoba lungavela emasontweni amabili owesifazane esethole umntwana.
Phakathi kwezimpawu olubonakala ngazo, kuthiwa owesifazane ubonakala njengomuntu ohlanyayo ( delusions), abone izinto ezingekho ( hallucinations), acasuke kakhulu, angafuni ukulala noma aphelelwe wubuthongo, wukushintshashintsha kwemizwa yakhe ( rapid mood swings) nokungakwazi ukuxhumana nabanye abantu.
Kuthiwa abesifazane abake babe nengcindezi ebizwa ngebipolar noma abake baba nokuhanjelwa yingqondo phambilini, kulula ukuba bahlaselwe yi-PPP.
Kuthiwa cishe u-5% wabesifazane ozibulalayo, usuke unale ngcindezi.
* UMA ukhulelwe uzwa sengathi unezinye izimpawu esezibaluliwe, kuthiwa kumele wazi ukuthi kakukho okungalungile ngawe, kodwa kungenzeka unengcinezi nje ejwayelekile, okuyinto okuthiwa iyenzeka kwabesifazane abakhulelwe.
* Uma usanda kuthola umntwana, kukhona izimpawu onazo kulezi ezibaluliwe, kubalulekile ukuba usheshe ukhulume nodokotela noma uphuthume esibhedlela uyofuna usizo.
* Uma sekuphele iminyaka eminingi usalokhu unomuzwa wukuthi unengcindezi, kuthiwa kubalulekile ukuxhumana nodokotela, kodwa kakumele kuphele isikhathi eside, kangakho kufanele uthole usizo ngokukhulu ukushesha.
* Uma uzwa izinto ezingazwiwa ngabanye abantu, noma ubona izinto ezingabonwa ngabanye abantu, kubalulekile ukusheshe ucele usizo lodokotela ungaze uzilimaze noma ulimaze ingane.
* UDkt Nyawose uthi kumele abantu bafunde ukuthi kazikho izifo okuthiwa ngezabantu, noma umuntu uthakathiwe, ikakhulukazi uma esanda kuthola ingane angabe esayiswa kwadokotela ngoba lokho kungana nemiphumela emibi.
* Uma owesifazane ebulale ingane ngenxa yale ngcindezi, uDkt Nyawose uthi njengodokotela bayakwazi ukuba ngofakazi enkantolo basebenzise umlando walowo osuke ebekwe icala, kodwa-ke nakhona kuya ngenkantolo nokuthi bona njengodokotela bebenawo yini umlando ngaleso siguli.
Lolu hlobo lwengcindezi lujwayele ukuhlasela abesifazane ngemuva
amane bebelethile. Uma ungalashiwe kuthiwa kungaphela unyaka owesifazane imbambile.
Kulabo abananoma yiluphi uhlobo lwengcindezi ababhekene nalo bangaxhumana nenhlangano engenzi nzuzo, iSouth African Depression and Anxiety Group (SADAG), onombolweni ethi: 0800 567 567