Usatshiswe ngokuphucwa ibhande uMantengu
UMagudulela usemzamela impi nebhokisa laseZimbabwe
USELINDE ukutshelwa ukuthi uzokulwa nobani u-Innocent “Tycoon” Mantengu okumele avikele ibhande leInternational Boxing Federation Africa Super Bantamweight ingakapheli inyanga ezayo.
Leli bhokisa seliyalelwe yile nhlangano ukuthi kumele livikele leli bhande ungakapheli uNhlolanja (February), kungenjalo lizophucwa lona. UMantengu ugcine ukungena eringini ngoNhlaba (May) nyakenye ehlula uDoctor Ntsele waseFree State. Le mpi ibiKwaMsane Hall, eMtu- batuba. Leli bhokisa lithi libuyele ejimini mhla ka-2 kwephezulu ukulungiselela ukuvikela leli bhande.
“UThulani Magudulela weLudonga Promotions ungazisile ukuthi sesinqunyelwe ugwayi katiki ukuvikela leli bhande. Ngilinde yena ngoba nguyena osebenza ukuthola ibhokisa engizokulwa nalo nokuthi ngizolwela kuphi. Bengifisa ukubuyela ngasekhaya eMtubatuba, kodwa uma kungenzeki ngingalwela noma yikuphi ngoba angifuni ukuphucwa leli bhande,” kusho uMantengu.
UMagudulela uthe umatasa namalungiselelo empi kaMantengu. Uthi kusetshenzwe kanzima kulandwa leli bhande, ngakho-ke ngeke kube kuhle ukuba lihambe ngaphandle kokuthi alivikele eringini. Uthi kungenzeka ayihlele ngokubambisana noThulani “3 Seconds” Nkwanyana obeyibhokisa, kodwa oseyinyanga edumile KwaZulu-Natal.
Uthi usaxoxisana nekhempu kaTapiwa Tembo waseZimbabwe ukuba kube yileli bhokisa elilwa noMantengu. Uthi le mpi kumele ibe ngasekupheleni kukaNhlolanja. Izimpi zikaMantengu zihlelwa nguMagudulela, kodwa akasekho ejimini yakhe njengoba esezinze eGauteng.