UPHINDE WAQINISA ITHIMBA LABAQEQESHI UMVOTI

UMVOTI FC sewuqashe omunye umqeqeshi ukuba yiphini likaKabelo “KB” Sibiya oyinhloko yabalolongi bale kilabhu enqobe iDabeka Sporting ngo-1-0 wegoli likaNkosingiphile “Mbeje” Khoza koweSouth African Football Association (Safa) KwaZulu-Natal ABC Motsepe League ngoMgqibelo eKing Edward, eGreytown.

ILANGA lithole ukuthi le kilabhu isiqashe u-Alex Mpumelelo Zondi ongemusha kulo mkhakha njengoba phambilini eke wayibamba kwiDurban Stars kaPhindani Nene, kwiBatau FC ebigijima kwiNational First Division (NFD), kwi-Ashley United isengaphansi kwabaphathi baseThekwini ukukha nje phezulu. UZondi uqale ngoLwesihlanu kulo msebenzi kanti ubehleli ebhentshini le kilabhu inqoba iSporting.

Lezi zindaba ziqinisekiswe nguBonginhlanhla Gwala ongumnikazi woMvoti ogcizelele ukuthi uhlose ukubona ezakhe zinyukela kwiNFD ngesizini ezayo.

I-X1 Experience yethuse abalandeli abaningi bebhola lalesi sigaba ishaya iRainham Sporting ngo-1-0 wegoli likaMzwakhe Mbutho ngoMgqibelo e-Eastbury Grounds. IKwaDukuza FC inqobe iHappy Wanderers ngo-2-1 ngoMgqibelo eStanger High School.

Amagoli eKwaDukuza abhakuziswe nguSkhanyiso Radebe noThabiso Nzimande kwathi eleWanderers leza noSiphesihle Dlamini. Eminye imidlalo ebekumele ibe khona ngempelasonto ihlehlisiwe ngenxa yokungatholakali kwezinkundla. Le midlalo ngoweMilford FC neDurban FC obekumele ubeseMhlathuze Sports Complex noweMaritzburg City ne- Edendale Juventus obekufanele ugijinywe eMpumalanga Stadium, eHammarsdale.

Imiphumela yemidlalo yeSafa KZN ABC Motsepe League imi kanje: Dynamos 3, Ashley 0; Rainham 0, X1 Experience 1; uMvoti FC 1, Dabeka 0; Ladysmith United 4, GWP 1.

Imidlalo yeSafa KZN ABC Motsepe League engoLwesithathu imi kanje:

EStanger High: KwaDukuza United vs X1 Experience 15h00.

ESugar Ray Xulu: Dabeka Sporting vs Durban FC 15h00.

EMpumalanga: Maritzburg City vs Ashley United 15h00.

E-Eastbury Ground: Rainham Sporting vs Ladysmith United 15h00.

EWorkington: GWP Friends vs Milford FC 12h00.