UMDLALI WOSUTHU AKANALO UVALO NGEZIMPOFANA
UKHALA ngesifo esihlasele AmaZulu FC uNhlanhla “Villa” Vilakazi ongukaputeni wale kilabhu ehlelelwe umdlalo omqoka we-Absa Premiership ezowugijima neKaizer Chiefs ngoLwesithathu ngo-19h30 eKing Zwelithini Stadium, eMlazi.
USuthu luya kulo mdlalo nje, lushayane lwaze lwabukana neHighlands Park kuba ngu-0-0 koweligi ngoMgqibelo ebusuku eMlazi.
IChiefs kayizange igijime mdlalo weligi ngempelasonto njengoba ibimatasa noweCaf Confederation Cup ebibhekene kuwona neZESCO United yaseZambia izolo ngeSonto ntambama kulo leliya lizwe. IChiefs idliwe ngo-3-1 kulo mdlalo.
IChiefs ilibhekise eZambia ihambela phezulu njengoba inenebule iBidvest Wits ngo-2-0 ovuthayo koweligi ngeledlule eBidvest Stadium, eGoli. USuthu yilona oluyizimfivilithi ukunqoba lo mdlalo njengoba lungakaze luhlulwe eMlazi selokhu kuqale isizini.
UVilakazi ukhala ngesifo athi sihlasele oSuthwini.
“Umdlalo wethu neHighlands bekufanele siwunqobe. Senze yonke into ngendlela kodwa ibhola langafuna ukungena enethini.
"Singenelwe yisifo esibi sokushweba amathuba alula. Ngokwami nje kayikho into engako edinga ukulungiswa, konke sikwenza kahle yiphambili nje qha, amagoli ayanqaba. Kodwa-ke nginethemba lokuthi sizowunqoba lo mdlalo ngoba kasidedeli lutho ekhaya,” kusho uVilakazi.
Ube esenza isicelo kubalandeli bezakhe njengoba kulindeleke ukuba inkundla igcwale phama.
“Ngiyabacela abalandeli bethu ukuba baphume ngobuningi babo bazoseseka, bangavumeli ukuba sigqitshwe yiChiefs, nathi sizozama ngawo wonke amandla ukubajabulisa ngewini.
Amalungiselelo siwaqale kahle, konke kubukeka kuhamba kahle. Kasinalo uvalo ngalo mdlalo,” kusho uVilakazi okulindeleke ukuba asebenze ngokuphindiwe ebhekene noGeorge Maluleka benoWillard Katsande esiswini seChiefs.
Isiyonke imidlalo ye-Absa Premiership engoLwesithathu iqhathwe kanje:
ELoftus Versfeld Stadium: Mamelodi Sundowns vs Maritzburg United 19h30 (SS7).
EKing Zwelithini Stadium: AmaZulu FC vs Kaizer Chiefs 19h30 (SS4).
ECape Town Stadium: Cape Town City FC vs Free State Stars 19h30.