Usizi lukaMusona luyisibusiso kwiChiefs
Ufakwe endalini yikilabhu yakhe yaseBelgium
IKAIZER Chiefs isifake isicelo esiphuthumayo sokuba ibolekwe umgadli oke wenza izimanga kuyona. ILANGA lihletshelwe yimithombo yalo engaphakathi kwiChiefs ukuthi le kilabhu isifake isicelo esiphuthumayo kubaphathi baka- Knowledge “Smiling Assassin” Musona ( osesithombeni) odlala kwi-Anderlecht yaseBelgium, sokuba babakhulumele nale kilabhu ngenhloso yokuba ibaboleke lo mdlali izinyanga ezingu-6 ezisele ngaphambi kokuba kuvalwe isizini. UMusona ugqame ebholeni lakuleli edlala kwiChiefs kusukela ngo-2009 kuya ku-2011. Uyishayele amagoli angu-29 emidlalweni engu-49. IChiefs ibe isimdayisela iHoffenheim yaseGermany.
Akadlalanga isikhathi esitheni yamubolekisa kwi-Augsburg yakhona eGermany. Imsebenzise kancane yamubuyisela kwiHoffenheim ebe isimubolekisa kwiChiefs ngesizini ka-2013/2014.
IHoffenheim igcine ngokumdayisela i-Oostende yaseBelgium okuthe ekuqaleni kwesizini yamuthengisela i-Anderlecht.
Udonsa kanzima kule kilabhu selokhu kuqale isizini njengoba esashaye igoli elilodwa emidlalweni engu-8 aseyigijimile.
Kubikwa ukuthi le kilabhu ngoLwesihlanu olwedlule imfake ohlwini lwabadlali ebachithayo.
Kuthiwa iChiefs isigxume yahlala yafaka isicelo sokuba ibolekwe lo mdlali ngenhloso yokuba azoyisiza njengoba sekuphele amasizini ayela kwamane ingakaze inqobe nkomishi.
“IChiefs isilinde impendulo ngodaba lukaMusona. Isisifakile isicelo sokuba imboleke. Into engavimba nje wukuthi ne-Oostende ifuna abuye ngoba uyisebenzele kanzima. Cishe udaba lwalo mdlali luzocaca kahle ngaleli sonto,” kusho umthombo.
Imizamo yokuthola uBobby Motaung oyiMenenja-jikelele yeChiefs ukuba aphawule ngalolu
daba iphunzile njengoba ucingo lwakhe beluvaliwe. IChiefs izolo ngeSonto ntambama ibiseZambia njengoba ibibhekene neZESCO United yakhona koweCaf Confederation Cup.
IChiefs ifaka lesi sicelo nje, emasontweni edlule kuke kwavela ukuthi ifuna abuye kodwa lo mdlali wakuphika lokho.
Nokho ubengakazi ukuthi ikilabhu yakhe izomfaka ohlwini lwabadlali ezobachitha.