BAFUNA KUME YONKE INTO EZIMBABWE
SILOBE izolo ngoLwesithathu kuthiwa sebewu-5 abantu asebedlulile emhlabeni ezibhelwini eziqubuke emuva kwesimemezelo sikamengameli wakhona, uMnu Emmerson Mnangagwa, sokwenyuka kwentengo kaphethiloli ngo-150% kuleliya lizwe ezinsukwini ezimbalwa ezidlule.
Njengenhlayenza, uhulumeni usutshale umbutho wezempi ukuyobhekana nalezo zibhelu, okulandelwe wukuba kube nabafayo enhlokodolobha iHarare.
Enye yezinhlangano ezilwela amalungelo abantu ithe bawu-26 abantu abadubulekile kanti abanye bayakwesaba ukuya ezibhedlela ngoba bethi bangase baboshwe noma bahlaselwe.
Ngokombiko weNews24, amaphoyisa namasosha akuleliya lizwe asengene ngehheshe kwezinye izindawo zabadla izambane likapondo eHarare ahlasela abantu, ngokusho kweZimbabwe Lawyers for Human Rights.
Kuhlaselwe namahhovisi ekomkhulu leqembu eliphikisayo, iMovement for Democratic Change (MDC). Njangamanje sekuqubuke inkombankombane yezombusazwe ngalezi ziphithiphithi njengoba uNgqongqoshe wezokuPhepha, uMnu Owen Ncube, egxeka iMDC, uyinuka ngokufafaza udlame ngemizamo yayo yokuketula uhulumeni kaMengameli Mnangagwa ongene kulesi sikhundla emuva kokuphoqwa kukaMnu Robert Mugabe ukuba esule ngoLwezi (November) 2017.
IZimbabwe Congress of Trade Unions isicele ukuba kume yonke into eZimbabwe kuze kudlule izinsuku ezintathu kuphikiswane nokwenyuka kwentengo kaphethiloli.
I-MDC neminye imibutho eyeseka lo mbono, banxuse abantu ukuba bahlale ezindlini esikhundleni sokuba semigwaqweni. UMnyango wezobuDlelwano naManye amaZwe eNingizimu Afrika, usuzwakalise ithemba lokuthi izinyathelo ezithathwa wuhulumeni waseZimbabwe zizophumelela ukuxazulula lesi simo, ngokusho kokhulumela lo mnyango uMnu Ndivhuwo Mabaya.
Abantu baseZimbabwe abazinze eNingizimu Afrika bebebhikisha izolo ePretoria, benxenxa uMengameli Cyril Ramaphosa ukuba angenelele kule nyakanyaka yasezweni labo.
NaseNingizimu Afrika kuke kwaba nemvunge emuva kokuba unyuke waze wayofika ku-R17 ilitha ezindaweni ezimaphakathi nezwe.