Simanzonzo isimo eZimbabwe
INTUTHU yomlilo osha kwamakhelwane, ivame ukuphazamisa abanye omakhelwane, ikakhulukazi labo abasondele kulowo okubaswa kuwona umlilo. Ikloba lomlilo eliqubuke eZimbabwe emuva kwesimemezelo sikamengameli wakhona, uMnu Emmerson Mnangagwa, sokwenyusa intengo kaphethiloli ngo-%150, maqede wakhwela indiza elibangise eRussia, sithinte neNingizimu Afrika njengoba leliya lizwe liwumakhelwane naleli kanti kunenqwaba yabantu bakhona abagcwele kuleli.
Ukuze kwakheke isithombe esicacile, lokhu kwenyuka kwentengo kusho ukusuka ku-R15 kuya ku-R43 ilitha likaphethiloli. Ukwenyuka kangaka kwentengo kuyaqala eminyakeni ewu-10 kusuka ngesikhathi kusaphethe uMnu Robert Mugabe!
Lokhu kunyuka kubukeka kuyisifundo eNingizimu Afrika nayo eke yenyusa uphethiloli kwanyakaza izwe - yize ziziningi izinto eziyimbangela yokunyuka kwawo, kubalwa intengo kawonyela ongahluziwe nesimo sezohwebo emhlabeni.
KUCHAZANI LOKHU?
ILANGA lixhumane noDkt Shingai Mutizwa-Mangiza ongowokudabuka eZimbabwe - kodwa ozinze kuleli njengoba efundisa e-University of Western Cape - mayelana nalolu daba. Uthe ukwenyuka kukaphethiloli kuleliya lizwe ukufanisa nokuthela uphe- thiloli emlilweni ovele uvutha ngentukuthelo izakhamizi zaseZimbabwe ezinayo ngenxa yesimo somnotho ontengayo. Phezu komnotho onjena, kunokwentuleka kwemali ewukheshi abantu abadinga ukuyithola noma nini ukuze babhekane nezindleko zempilo yemihla ngemihla, yisite-leka sodokotela ngenxa yezimo abasebenza phansi kwazo, wuku-ntuleka kwawo uphethiloli osekuholele ekubeni kube nohide lwabantu abalinde ukuba bawuthole ukuze bakwazi ukuhamba, yisimo sezulu izangoma zalo ebezibike ukuthi kuleli hlobo imvula ezotho-lakala izogcina esilinganisweni esiwu40% waleyo evamise ukutholakala - konke lokhu uthe kunokwesaba ngakho ukuthi kungase kulandelwe wukuwa bhu komnotho waseZimbabwe.
Uthe lokhu kuhlangene nokomisa kwezulu, kungaholela ekubeni kube nendlala eZimbabwe. Uma ILANGA libuza ukuthi yini engase ilandele lapho uma lokho kwenze-
Ngenxa yokuthi kokubili uphethiloli nogesi kumqoka ekuhambiseni inqola yomnotho, kuyo le ngxoxo ILANGA licele ukuba uDkt Mutizwa-Mangiza asike elijikayo ngesicelo sabakwa-Eskom sokwenyuswa kwentengo kagesi ngo-15% kuleli iminyaka emithathu ilandelana. Uthe yiqiniso elibabayo ukuthi i-Eskom ibhekene nesimo esinzima sokuphelelwa yimali.
Wengeze ngokuthi ubona abathengi bengase bakwenqabe lokhu futhi bafune uhulumeni ungenelele ngokutakula le nkampani ngoxhaso nakhona okusazosetshenziswa yona imali yabantu.
USolwazi Somadoda Fikeni yena utshele ILANGA ukuthi abantu bakuleli basazama ukuvuka ekukhahlanyezekeni yintengo kaphethiloli eyenyuke iphindelela ngonyaka odlule, ngakho kunzima ukuba bayeseke i-Eskom kulesi sicelo sayo.
Uthe ubona uhulumeni ungase uyifukamele impendulo yawo esicelweni se-Eskom kuze kudlule ukhetho. Uma ILANGA libuza ukuthi kambe le ngwadla yakwa-Eskom ingase ibe namuphi umthelela ezithembisweni ezenziwe ngosozimboni zokutshala imali yokufukula umnotho waleli zwe odonsa kanzima, uthe kungenzeka kufike lapho uhulumeni kuyomele wenze iziqinisekiso kubatshalimali kunokuba ungakhombisi mdlandla wokulekelela ekuvusweni komnotho wezwe.