I-SABC IZOKHOKHELA ISISEBENZI ESAXOSHWA
INGENE kolunye utaku lwemali iSABC njengoba kumele ikhokhele obeyisisebenzi sayo u-R990 000 emuva kokunqanyulwa kwenkontileka yakhe ngoba esolwe ngobenguzakwabo ngokumcwasa ngokwebala.
Ngeledlule iNkantolo eNkulu yaseNorth Gauteng, ikhiphe isinqumo sokuthi iSABC kumele ikhokhele uMnu Pieter van der Berg, obengumsakazi wezemidlalo kwaSABC ngoba ubhecwe ngobubende inyama engayidlanga ngesikhathi esolwa ngomunye wozakwabo ngokumcwasa mhla ka-7 kuNhlaba (May) 2016 besakaza umdlalo weSuper Rugby.
Icala likaMnu Van der Berg, eliyiswe enkantolo yinyunyana yezisebenzi iSolidarity, kuthiwa kube wukuyalela lesi sisebenzi ukuba senze umsebenzi waso ngendlela efanele, kwazise sifike emuva kwesikhathi lapho ebesisebenzela khona futhi sangayihlonipha imiyalelo yenkundla abebesebenzela kuyona.
UMnu Anton van der Bijl, oyinhloko yezemithetho yezisebenzi kwiSolidarity, utshele ILANGA ukuthi abantu baseNingizimu Afrika akumele babheke ubuhlanga kuzo zonke izinto abahlangabezana nazo.
Esitatimendeni asikhiphile uthe: "Leli cala liyisibonelo samanye amacala lapho abantu bavele basebenzise indaba yokucwasa ngokobuhlanga noma yikanjani, ngisho kungekho ukucwasa."
Uthe inkontileka kaMnu Van der Berg inqanyulwe kusasele unyaka ukuba iphele, okwenze walahlekelwa yimali eningi (yomholo).
UNkz Neo Momodu, okhulumela iSABC, uthe isinqumo ngalolu daba basithole mhla ka-1 kuNhlolanja (February), ngakho-ke ngeke bakwazi ukuphawula ngalo kwazise, kusamele basicubungule.
Kuzokhumbuleka ukuthi kwenzeka lokhu nje, izinkinga zemali kule nhlangano ewumsakazeli womphakathi, zifana ncimishi neqatha emphinjeni njengoba ize yasikaza ukuchitha izisebenzi zayo ezilinganiselwa ku-1 000, eziqashwe ngokuphelele, neziyitoho ezilinganiselwa ku-1 200. Ngalokhu le nhlangano ibithi izokwazi ukonga imali elinganiselwa ku-R400 million ngonyaka.