I-COSATU ITHI ABASHENXE ABE-ANC ABANOGCOBHO
INTUTHU yezoso zamantshontsho kubukeka izwela emehlweni omfelandawonye wezinyunyana, iCosatu, odlelana neANC, njengoba uthi abaholi bakaKhongolose abathinteka emanyaleni okuthunjwa kombuso ( state capture) nasekubhubudlweni kwemali eVBS Mutual Bank, kumele bazehlise bashenxe ohlwini lwamagama abaholi baleli qembu abaqokelwe ukuba ngamalungu ephalamende nezishayamthetho.
Lokhu kushiwo nguMengameli weCosatu, uNkz Zingiswa Losi ( osesithombeni) ngoLwesibili esigcawini sabezindaba eBraamfontein, eGoli, emuva komhlangano oyisipesheli wesigungu esikhulu salo mfelandawonye wezinyunyana.
Ukhuluma kanjena nje, sezihubela sakusha ngokhetho lukazwelonke, oluzoba ngoNhlaba (May) nonyaka.
Ngeledlule, ikhomishini ephenya ngodaba lokuthunjwa kombuso, eholwa yiJaji Raymond Zondo, izwe ubufakazi mayelana nokuthi zathuthukiswa kanjani izakhiwo ezisegameni likaNgqongqoshe wezokuMbiwayo, uMnu Gwede Mantashe, elikaNgqongqoshe wezeMvelo, uNkk Nomvula Mokonyane, nelikaNkz Dudu Myeni obengusihlalo weSouth African Airways (SAA), ngokwahlukana kwazo, kusetshenziswa amantshontsho aseBosasa.
Yize kunjalo, i-ANC isamile ekutheni phela le khomishini yeJaji Zondo kayiyona inkantolo - okusho ukuthi amalungu ayo athinteka kuyona kawanacala.
UNkz Losi uthe iCosatu yanquma engqungqutheleni yayo yanyakenye ukuthi izokhankasela ukuba kunqobe i-ANC okhethweni futhi izolivikela leli qembu.
Isekela likamengameli weCosatu, uMnu Mike Shingange, lixwayise ngokuthi abaholi beANC abamanaphanapha bazokwenza ukuthi leli qembu lingakwazi ukusebenza kahle futhi kube nzima ukuba livotelwe.