Umnyango wenqaba negunya lobukhosi
Umndeni ufuna kuphathe inkosi ebidonsa isigwebo ejele
IZWAKALISE intukuthelo iNkosi yakwaMbotho, eHarding, ngekuchaza njengokucindezelwa wuMnyango wezokubusa ngokuBambisana nezoMdabu KwaZulu-Natal njengoba ithi kawufuni ukuyigunyaza njengenkosi ngoba kade idonsa isigwebo sikadilikajele, yize umndeni usuqoke yona ukuba ihole isizwe.
Inkosi ithi sekuphele unyaka isizwe sikayise singenayo inkosi, okunomthelela omubi ekuthunyelweni kwentuthuko emphakathi njengoba izinhlelo zayo (intuthuko) zisayinelwa yinkosi. Indaba iqale kushona uyise, iNkosi Mageba Mbotho, ngoZibandlela (December) 2017.
Ngaleso sikhathi ibigwetshwe ukudilikelwa yijele ngecala lokubulala kusuka ineminyaka ewu-21 ubudala. INkosi Mbotho ithole ushwele ngo-2018 - emuva kokudonsa iminyaka ewu-17, umndeni wanquma ukuba ithathe isihlalo kodwa umnyango uyenqaba.
Isikhundla besibanjwe ngumfowabo wenkosi, uMnu Valela Mbotho, naye ongasekho. ILANGA liyibonile ikhophi yamaminithi omhlangano womndeni lapho kuqokwe khona iNkosi Mbotho kwesobukhosi, iphakanyiswe uyise omdala oyinhloko, (ongasekho) uMnu (Mshikilana Mbotho, ozofihlwa kule mpelasonto.
“Le mihlangano siwumndeni sibe nayo kusukela ngoNhlolanja (February), namanje umnyango kawufuni ukuthatha isinqumo, sekuze kwashona nobaba omdala, oyinhloko yekhaya,” kusho iNkosi Mbotho.
Ithe umnyango wala negunya lobukhosi ngoba yake yaboshwa futhi umthetho waseNingizimu Afrika kawuvumi ukuba umuntu oke waboshwa izinyanga ezingaphezulu kuka-12 wangakhokhiswa inhlawulo ngecala abhekene nalo, ahole umphakathi.
“Siwucwaningile lo mthetho nabameli bethu, sathola ukuthi usebenza kobesesihlalweni eyinkosi,” kusho iNkosi uMbotho.
Ithi kukhona okushaya amanzi kulolu daba kwazise isisebenzi somnyango - ILANGA elinalo igama laso - kasifuni nokuyizwa indaba yayo. “Abameli bethu sebebhalele umnyango ukuwucha- zela ukuthi lo mthetho ongivimba ngawo usebenza kanjani,” ichaza.
Ithe lesi sisebenzi somnyango esiphethe udaba, sincamela ukuba umndeni ulobole intombi yomfowabo ashona eyicelile, anezingane nayo, ukuze uma isishintsha isibongo, bunikwe yona ubukhosi, ibambele izingane.
“Kuyaxaka ukuthi lezo zingane zizobuthatha kanjani ubukhosi ngoba kufana nokuthi zizalelwe ngaphandle, kwazise umfowabo ubengakashadi ezithola, futhi akazalwa ngumama wami owalotsholwa yisizwe sakwaMbotho.
"Noma ubesaphila, ubengeke abe yinkosi ngoba bukhomba mina,” kusho iNkosi uMbotho. Incwadi ebhalelwe iNkosi uMbotho yangomhla ka-14 December 2018, engomthetho ngaphansi kwesigaba 21 (1)(a) seKZN Traditional Leadership and Governance Act No. 5 of 2005, uzwakala ukhuluma ngenkosi esesihlalweni ukuthi uma ilahlwa yicala elizoyihlalisa ejele izinyanga ezingaphezulu kuka-12, futhi kungashiwo ukuthi ikhokhe inhlawulo, kayisafanele ukuhola abantu.
Ikhansela lendawo, uMnu Wiseman Mbotho, lithe lolu daba selwenze kwangasebenzeka endaweni nemicimbi yokugqugquzela amasiko nezobuciko entsheni kayenzeki ngoba isizwe kasinayo inkosi egunyaziwe. Lithe imali ebalelwa ku-R12 million yokwakha izindlu zomxhaso, ijikisiwe ngoba intuthuko elethwayo endaweni kufanele isayinelwe yinkosi. Kunezinhlelo ezifana nokubuyiswa komhlaba ikhansela elithi kabakwazi ukuqhubeka nazo ingekho inkosi.
USihlalo weNdlu yabaHoli beNdabuko KwaZulu-Natal, iNkosi Phathisizwe Chiliza, ithe nakuba udaba belungakafinyeleli kubona, kodwa uma ilulalela, ludi-nga izingcwepheshi zamasiko ngoba ubukhosi buhambisana kakhulu namasiko nakuba umthetho kufanele ulandelwe, kodwa kufanele ungacindezeli izinto zamasiko.
“Nakulesi sigaba (somthetho), kangiboni ukuthi yini evimba umuntu owaboshwa emncane, engakabi yinkosi, nosehlunyelelisiwe ngokwesimilo ejele nalo labona ukuthi usefanele ukubuyela emphakathini nabakubo bamethemba ngokumnika ubukhosi bakhe, kube sekuthiwa umthetho kawuvumi,” kusho iNkosi uChiliza.
INkosi Chiliza ithe kufanele kuchazwe ukuthi ubukhosi akubona obukahulumeni, ngobesizwe nomndeni, kepha uhulumeni welekelela ngokubhekisisa ukuthi umthetho uyalandelwa yini, kodwa kubhekwe ukuthi awuphambani nesiko lase-Afrika, ubukhosi obuncike kakhulu kulona.
Ithembise ukulufakela izibuko lolu daba.
Okhulumela uMnyango wezokuBusa ngokuBambisana nezoMdabu KwaZulu-Natal, uMnu Lennox Mabaso, uthe ngeke bakhulume ngodaba lobukhosi esidlangaleni, kwazise lubucayi, luthinta umndeni ngokosiko.