I-SAFDA IFEZE ISETHEMBISO SAYO NGOKUXHASA ABALIMI
IBIBHALWE ebusweni injabulo kubalimi abamnyama basezindaweni zasemakhaya ababalelwa ku-11 000 emuva kokuphuma kwemali abebeyithenjiswe yinhlangano, iSouth African Farmers’ Development Association (Safda), engene kuma-akhawunti abo ngoLwesine olwedlule.
Kuzokhumbuleka ukuthi ILANGA like labika ukuthi iSafda inike abalimi - iningi elingaphansi kwayo - u-R60 million abazohlukaniselana wona, ukubalekelela emshikashikeni wokulima.
Ngeledlule leli phephandaba lihambele izindawo ezehlukene eGingindlovu naseMlalazi ukuyozizwela kubalimi mayelana nale nkece. Bebebonga bengaphezi kwiSafda.
UNkk Norah Mngadi (74) waseSabeka, eGingindlovu, utshele ILANGA ukuthi selokhu waqala ukulima umoba eminyakeni ewu49 edlule, kodwa akakaze athole imali efana nalena ayitholile ngokuphela kukaMasingana (January).
“Kumanje ngidlile ngisuthi nomndeni wami. Kangikholwanga ngesikhathi ngithola umqhafazo wasebhange uthi kunemali engenile. Ngiyabonga kwiSafda ngokusebenzela thina njengabalimi abamnyama ababhekene nengwadla yokuncintelwa ngogobhela kwezabo, abanazo zonke izinsizakusebenza,” kusho uNkk Mngadi.
UNkk u-Elizabeth Nzuza, naye ongowaseSabeka, uthe: “Le mali bengingayilindele, ingifice nginezindleko eziningi kwazise ngoMasingana kade sibuyisela izingane esikoleni, imali ingekho.
"Singabalimi abamnyama sibhekene nenkinga yokusweleka kukamanyolo namakhemikhali okushisa ukhula, amasenti amancane esiwatholayo, kawazenzi zonke lezi zidingo,” kusho yena.
UNkk u-Antonia Dlamini waseMlalazi, ucele ukuba balekelelwe, batholelwe amakhemikhali nomanyolo.
“Sesiside isikhathi silima sibhekene nezinkinga zokungabi nazo izinsiza.
"Emasentini esiwatholayo, kasikwazi ukuzithengela lezi zinto ngoba zibiza kakhulu.
"Sizibona sibuyelwa yithemba uma iSafda isinika imali futhi ukhona umehluko ezowenza,” kusho yena.
USihlalo weSafda, uMnu Siyabonga Madlala, uthe kumnandi ukukhuluma into bese iyenzeka.
“Ngifisa ukubonga kakhulu kubalimi abalokhu beseseke njalo. Kulabo abanezikhalo ngomanyolo, sinohlelo lokubadayisela wona ngamanani aphansi, izindleko ezijwayelekile kasizifaki ngoba sizama ukuhlangabezana nabo kulokhu abakhala ngakho.
"Le mali abayitholile izotholakala kabili ngonyaka njengoba sithembisile,” kusho uMnu Madlala.