Umuzwa wothando mawuqale ekhaya
UMUZWA wothando kumele uqale endlini ohlala kuyona ngaphambi kokuba ube yinto okubukiswa ngayo ezinkundleni zokuxhumana kodwa kube kubanda ekhaya. Lokhu kushiwo nguGabrielle Fagan, oyi- interior designer ocashunwe kwi-website i: www.hertsad.co.uk, othe kakudingi ukuba kuze kuguge iphakethe uma ufuna ukunika ikhaya lakho umuzwa wothando ohambisana nosuku lweValentine's, okubalulekile wukuba uqikelele izinto ezincane ezingenza umehluko omkhulu ukunika ikhaya lakho leyo mfudumalo.
Uthi uthando kumele luqale lukhonjiswe endlini umuntu ahlala kuyona ngokusebenzisa imihlobiso esanhliziyo nezimbali ezi- fresh.
UGabrielle ufakazelwe nguNkz Phila Ndlovu weZaPhila Interior Designs, othe ukushintshashintsha izintwana ezincane uma uhlobisa ikhaya lakho kufana ncamashi njengesinongo ekudleni. Ugxile kakhulu egunjini lokulala athe yilona elibalulekile, ikakhulukazi njengoba kuyiValentine's Day.
“Abaningi uma becabanga ngeValentine bacabanga umbala obomvu kuze kugcine kuyiwo osugqame kakhulu. Miningi imibala engasetshenziswa bese obomvu uthi gqwa gqwa, ngoba vele kuyaziwa ukuthi uhambisana nalolu suku.
“Lo mbala ungawengeza ezintweni ezifana nomata waphansi noma kuma- scatter cushion. Okunye kungaba ngamakhandlela anuka kamnandi abomvu ozowabeka ngendlela yobunono egunjini lokulala bese ufafaza nezimbali ezibomvu,” kusho uNkz Ndlovu.
Okunye okubalulekile wumgomo wokuthi kube khona umhlobiso odonsa amehlo endlini, wacebisa ngokubeka isibuko maqondana nombhede noma kube ne- wallpaper. MALUQHAKAZE UTHANDO
Akukho okwedlula izimbali uma ufuna ukukitaza imizwa ejulile yesithandwa sakho. Ziningi izinhlobo ongakhetha kuzona kodwa ama- rose asahamba phambili. INTOKOMALO
Kunezinye izipho ezikushiya untofontofo njengama- cushion anoboya noma awe- velvet kulabo abathanda ukunkonkoshela.
ZENZELE ELAKHO IPHARADISI
Mkhulu umthelela oba khona uma ukitaza ngesikhathi esisodwa imizwa yokubona, eyokuzwa neyokunuka.
Dlalela phansi umculo opholile, ukhanyise amakhandlela anephunga elimnandi uma uhleli nesithandwa sakho. Eminye imibala ongayisebenzisa ngaphandle kobomvu ngo- pink nomhlophe.
UNGALINDI UMHLAKA-14
Uthando malungapheli ngoba sekwedlule iValentine's Day Makungapheli emlonyeni wakho ukuhlale uncoma isithandwa sakho noma sekwedlule lolu suku.
Makube nezintwana ezincane ezenza ukuba isithandwa sakho sihlale sikhumbula ukuthi sibalulekile njengokusibhalela ipheshana elinamagama amnandi, noma ukumthumela izimbali emsebenzini nokunye.