BABHACAZILE NGOMKHANKASO WABO ABAKWA-WOOLIES
UMSINDO oqubuke kubathengi ugcine uphoqe ukuba abesikhondlakhondla sesitolo sezingubo nokudla, iWoolworths, bangabe besaqhubeka nomkhankaso wabo wosuku lwezithandani i#LoveAlwaysWins.
Lo msindo uqubuke ngemuva kokuba abathengi bezwakalise ukungenami kwabo ngoba besola ukuthi lo mkhankaso unokucwasa ngokobulili.
Lo mkhankaso obonakale ezitolo eziningi ngoMsombuluko, ubunemibhalo eyahlukene echaza izinto ezahlukene ezibukeka zizincane ebudlelwaneni kodwa zibe zinomthelela wokubanga isidina.
Inhloso yalo mkhankaso bekunguveza ukuthi noma zingaba khona lezo zici kodwa ngenxa yothando zishaywa indiva, okugcine kuyi-hashtag yawo lo mkhankaso ethi #LoveAlwaysWins. Eminye yale mibhalo, ebhekiswe kwabesifazane ibithi: “She orders a salad then steals your chips; she takes forever to get ready; she snuggles you to the edge of your bed; she makes you her Instagram husband; she says she ís 'fine' when you know she ís not.”
Kweyabesilisa bekubhalwe ukuthi: “He uses your perfume for air freshner; He makes plans without telling you; He uses the wrong emojis in text messages and believes he's entitled to the remote control.”
Kunengxenye yabathengi ezwakalise ukungasithakaseli lesi sikhangiso abebesibiza ngesicwasayo kangangoba noJeremy Sampson weBrand Finance Africa, ezwakalise ukudumala ngendlela ezinye izinkampani ezidicilela phansi isithunzi sazo.
“Kuthi ngiphalaze,” kuphawula u-@ ekhasini leTwi-tter. U-@ uthe: “Ngiyazibuza ukuthi abengamele ezokumaketha bafike kanjani kulesi sinqumo. Kubukeka sengathi akusetshenzwanga ngokubambisana kodwa kube yisinqumo somuntu oyedwa lesi. Lokhu kuyasiphoxa lesi sitolo.”
Emuva kwalo msindo abalesi sitolo bakhiphe isitatimende baxolisa, baqinisekisa ukuthi bekungeyona inhloso yaso ukucwasa kodwa bebebheke kakhulu imikhutshana ejwayelekile eyenzeka kubantu abasebudlelwaneni.
“Siyaxolisa kakhulu kubathengi uma lokhu kungehlanga kahle, yingakho sesithathe isinqumo sokungabe sisaqhubeka nawo (umkhankaso),” kusho isitatimende.