SANDILE MAKHOBA
UYAZIGQAJA ngomsebenzi wakhe angawufundelanga we- graphic designing, uMfundo ‘La Saint’ Mkhize, osezakhele igama eThekwini namaphethelo ngenxa yezinga lomsebenzi wakhe. UMfundo uthi ukuzimisela nokuhlale elangazelele ukwazi okusha ngaso sonke isikhathi, yikhona okumenza agcine esethathwa njengochwepheshe kulo msebenzi. Ngemuva kokuphothula izifundo zakhe zika-matric eSipingo Secondary wahamba wayofunda eDamelin College enza iPC Engineering, agcina engayiqedanga. “Ngo-2010 ngangenza umsebenzi wokuba ngu-DJ ukuze ngikwazi ukuthola amasenti okuqhubeka esikoleni. Ngisenza lowo msebenzi ngabona ithuba lokwenza izikhangiso ( flyers design) zakhona emakilabhini,” esho. Kulezo zikhangiso owayezenza wayefaka igama lakhe kuzo, okwenza nabanye bamqasha ukuba abenzela umsebenzi ngenxa yokuthi babewuthanda umsebenzi wakhe.
“Ngangithola umsebenzi ezindaweni ezifana no-Scallas, ise-Afro, iPlush nezinye. Lokho kwangigqugquzela ukuba ngishiye phansi ukuba nguDJ ngizinike isikhathi kulo msebenzi ofaka imali,” esho. Ngenxa yokwanda nokukhula komsebenzi wabe esevula inkampani yakhe iLa Saint Creationz. Njengamanje le nkampani yakhe yenza umsebenzi wezinkampani ezinkulu - yenza yonke into ethinta iGraphic Design emaphephandabeni nakubaphephabhuku.
Uphinde enze nemibhalo enamathiselwa ezimotweni ( car branding) nokunye. Ngaphandle kwalokhu inkampani yakhe iphinde yenze umsebenzi wokuthwebula izithombe iphinde iqophe nama- video. Uqashe abantu ababili asebenza nabo kanti uzimisele ngokuba ikhule inkampani yakhe yandise amathuba omsebenzi. Ugqugquzela abantu ukuba bawuhloniphe umsebenzi abawenzayo baphinde bahloniphe namakhasimende.
“Okunye okungikhulisayo wukuthi amakhasimende ngiwaphatha ngendlela elinganayo ukuze nalowo olethe imali encane mhla ethola umsebenzi omkhulu angikhumbule,” esho.
Uthi kwesinye isikhathi amakhasimende uyawavakashela lapho ekhona ukuze ezothola kahle ukuthi yini ngempela ayidingayo.