OWE-BAY UNETHEMBA NGE-PREMIERSHIP
ITHEMBA esikhulwini seRichards Bay FC nge-Absa Premeirship yize bekungekho ezinhlelweni zaso ngale sizini ukunyukela kulesi sigaba.
IRichards Bay izobhekana neCape Umoya United koweNational First Division (NFD) ngeSonto ngo-15h30 eMhlathuze Sports Complex, eRichards Bay.
IBay ibukeka isethubeni lokungena kweyama- play off njengoba ziyihambela kahle izinto.
Isendaweni yesihlanu kwi- log okwenza ibuyelwe yithemba.
USifiso “Jomo” Biyela ( osesithombeni) ongumnikazi weBay uthi kuyamethusa okwenziwa ngezakhe ngoba bebengakuhlosile ngale sizini.
“Ngale sizini besihloze ukuzovikela ilungelo lethu lokudlala kulesi sigaba bese kuthi ngezayo silwele ukungena kwiPremiership.
"Ngendlela izinto ezenzeka ngayo ithuba lokungena kwiPremiership liyavela ngakho-ke ngeke sisaliyeka sizophusha.
"Ngifuna ukudlulisa ukubonga okukhulu kubadlali ngokuzinikela, bonke uyabona ukuthi banenhloso ngekilabhu yingakho engekho ongakaze adlale selokhu kuqale isizini.
"Uma ubheka imidlalo esidlule kuyona oweStellenbosch besinganikwa lutho ekuhambeni kodwa sabuya namaphuzu agcwele.
"Sibuye lapho sahlula iFree State Stars koweNedbank Cup ekuhambeni sabe sesihlula neTS Sporting ngeledlule sisekhaya.
"Yonke le miphumela iyakhombisa ukuthi kukhona abadlali abakuhlosile ngakho-ke kufanele sibeseke ngayo yonke indlela ngoba ithuba liyaziveza,” kusho uBiyela.
Uqhube ngokuthi iCape Umoya izofika beyilindele.
Ube esenxusa abalandeli ukuba baqhubeke nokuphuma ngobuningi babo ukuzokweseka le kilabhu.
Amathikithi alo mdlalo abiza u-R20, azobe etholakala enkundleni.
* Isiyonke imidlalo yeNFD engempelasonto ihlelwe kanje:- KUSASA NGOLWESIHLANU E-Athlone: Ubuntu Cape Town vs Jomo Cosmos 15h30. NGOMGQIBELO KaNyamazane: Mbombela United vs Stellenbosch FC 15h30.
EPuma Rugby: Witbank Spurs vs UThongathi FC 15h30.
EChatsworth: Royal Eagles vs University of Pretoria 15h30. NGESONTO EMhlathuze Sports Complex: Richards Bay FC vs Cape Umoya United 15h30.
EKameelsrivier: TS Galaxy vs Real Kings United 15h30.
E-Athlone: Ajax Cape Town vs Tshakuma Tsha Madzivhandila FC 15h30.
Kabokweni: TS Sporting vs Maccabi FC 15h30.