OwoSuthu unesilonda ngezikaBenni McCarthy
UJohnson uthi akakhohliwe yisibhaxu asithole eCape Town
UNESILONDA esibhibhayo umqeqeshi wamaZulu FC ngeCape Town City abazogadulisana nayo koweAbsa Premiership ngoMgqibelo ngo-20h15 eKing Zwelithini Stadium, eMlazi.
UCavin “Mthakathi” Johnson ocija uSuthu utshele ILANGA izolo ngoLwesithathu ukuthi kuqaqamba inhliziyo uma ekhumbula induka ka-3-0 abayinikwe yiCity eKapa ngonyaka odlule. USuthu luya kulo mdlalo nje, lusanda kubhuquzisa izingqwele ze-Absa Premiership, iMamelodi Sundowns ngo-2-0 ekuhambeni okwenze lwahlala endaweni ka-11 kwi-log ngamaphuzu angu-20 emidlalweni engu-19.
UJohnson uthi lona kuzokuba ngumdlalo omuhle kakhulu njengoba womabili la makilabhu ekhombisa ukungagayelwa mphako futhi esefomini enhle kakhulu kulezi zinsuku.
Uthi kumanje uphithene ikhanda ngesikwati okufanele siqale umdlalo njengoba bonke abadlali bakhe bekhombisa ukulambela ukudlala.
Phakathi kwabadlali abangase babonakale kulo mdlalo kubalwa uTalent Chawapiwa osuka kwiBaroka FC abasanda kumsayinisa.
“Okuhle ngoChawapiwa wukuthi ubevele elithola ithuba lokudlala kwiBaroka FC. Lokho kwenza kube lula kakhulu kuyena ukusheshe ajwayele izindonga akuzona. Ngikholwa wukuthi kumfanele ukudlala ngoba usesimweni esi- fanele ngokomzimba nangokwengqondo,’’ kusho uJohnson.
Ngodaba lukaTshepo Gumede ozama inhlanhla kumaZulu uthe bazonquma ngaye kungekudala. Ephawula ngokuhamba kuka-EMilliano Tade ojoyine iSundowns emthenge ngetshe lemali ngesonto eledlule yaphinde yadedela nomgadli, uBongi Ntuli ngaphezulu, uJohnson uthe: “Ukuhamba kukaTade kusilimazile impela kodwa kayikho into esingayenza uma umdlali ethola ithuba kwenye ikilabhu.
"Ngangishilo kwasekuqaleni ngixoxa naye uTade ukuthi uma eqhubeka nokuqobela amagoli ngalolu hlobo kungenzeka athole ithuba emakilabhini amakhulu. Ngeneme kakhulu ngokubuya kukaMabhuti Khenyeza futhi okuhle ngaye wukuthi uzimisele ngokucosha ulwazi,” kusho uJohnson.
UKhenyeza uzwakalise ukujabulela ithuba alinikwe yizikhulu zoSuthu.