UMNDENI "UHLASELE" UMFUNDISI ESONTWENI
KUPHAZAMISEKE ukukhonza ebandleni labasindisiwe, iRoyal Priesthoood, eSweetwaters, eMgungundlovu, eliholwa nguMfu Bhelebane Ntuli ( osesithombeni), kugasela umndeni wowesifazane okhonza kulona, ufuna ngodli ikhadi lakhe lasebhange okuthiwa selihlala kumfundisi.
Umndeni kaNkz Khanyi Ngcobo (31), osebenza ukufunda amamitha (amanzi) kuMasipala waseMsunduzi, uthi selokhu ejoyine ibandla likaMfu Ntuli - obuye ashayele uhlelo olubizwa ngeMvuselelo kwiMbokodo FM, olungena ngo-18h0021h00 njalo ngeSonto - usefana nomuntu ogula ngekhanda.
UMnu Mlu Ngcobo, umfowabo kaNkz Ngcobo, uthi ngisho imali yebhonasi ayithole ngoMfumfu (October), uyithathe yonke wanikela ngayo esontweni.
“Ubeke athengele umfundisi i- airtime ka-R1 200. Ngosuku ahola ngalo uboleka imali kubantu ngoba ikhadi lakhe lasebhange lihlala kumfundisi. Uma simbuza ukuthi uyenzani imali, ubevele abhoke ngolaka, athi masimyeke imali unikele ngayo esontweni.
“Uhluleke ngisho nokuthengela ingane yakhe eneminyaka emine ubudala izimpahla zikaKhisimusi ngonyaka odlule ngoba ubengenalo ngisho isenti, imali esenikele ngayo yonke. Emholweni wakhe wangoZibandlela (December) akazange athole lutho, besibona ngemiyalezo nje eshoyo ukuthi sekukhishwe malini ekhadini lakhe.
“Kuthe ngoMasingana (January), samphoqa ukuba avale ikhadi lasebhange. Kuthe kufika usuku lokuhola, sabona ngomfundisi esefona ethi imali kayisaphumi ekhadini, sekwenzenjani. Umncengile ukuba bahlangane eMgungundlovu ayolivula uma kuwukuthi ulivalile.
“Uma esefonelwa yileli sonto lakhe kuvele kube sengathi uyagula, akezwa mshini. Uke wadayisa ngisho ngezinwele azithenge ngoR4 000, ezidayisa ngo-R150 ngoba efuna imali yokuya esontweni,” kusho uMnu Ngcobo.
Uthi njengoba udadewabo ebengasenayo imali, ikhadi lingasa- hlali kuyena, uke waya nasebhange waboleka u-R10 000. Kuleyo mali engene kwelinye ikhadi lakhe, ukhiphe u-R3 000 wathengela umfundisi iwashi njengesipho mhla ka-31 kuZibandlela, enye akwaziwa ukuthi uyenzeni.
“Le nto yakhe yokusanganiswa yileli bandla ngisola ukuthi kade yamqala ngoba kukhona isikhathi lapho okuthiwa uke warentela ibandla indawo yokukhonzela. Size sizogasela la ebandleni nje, yingoba sesikhathele yile nto yalaba befundisi,” kusho yena.
UMfu Ntuli ufike ngezithuba zabo-13:30 enkonzweni umndeni kaNkz Ngcobo usumlinde ngaphandle neLANGA likhona ukuyozizwela.
Uthe kuyiqiniso ukuthi uNkz Ngcobo ubebarentela esontweni.
“Bengingeke nginqabe uma kukhona umzalwane othi ucela ukusikhokhela irenti. Ubeke angithengele i- airtime futhi bonke abantu la esontweni bayaye bangithengele. Kalikho icala kulokho,” kusho uMfu Ntuli.
Uphikile ukuthi ikhadi likaNkz Ngcobo lihlala kuyena nokuthi imali yebhonasi uyinikele kuyena.
“Ngike ngezwa kuthiwa ikhadi likaKhanyi likimina. Empeleni ikhadi likumzalwane engisebenzisana naye, uMnu Kaputeni Magubane engingazi ukuthi lafika kanjani kuyena. Ngithe uma ngimbuza uKaputeni emuva kokuzwa lokho, wathi uzolibuyisela.
“Yize ngingeke ngiqinisekise, kodwa sengathi kunento abebeyenza noKaputeni yokujola ngoba uze wamthengela ngisho iwashi, wamnika kubuka bonke abazalwane esontweni,” kusho uMfu Ntuli.
Uthi imphatha kabi eyokuthi le nto igcine ingcolisa igama lakhe, kodwa ayikho into azoyenza, noJesu wawathwala amacala abantu.
UMnu Magubane uthe akazi lutho ngekhadi likaNkz Ngcobo lasebhange, kalikho kuyena.
“Ngiqala ngani ukuzwa ngalolu daba, bengingalwazi. Lo othi likimina uyanikhohlisa, ngibhecwa ngobubende inyama ngingayidlanga. Umuntu ongacacisa kahle lolu daba futhi asinike izimpendulo eziqondile, nguyena uKhanyi, asho nokuthi ikhadi lakhe lasebhange walinika bani,” kusho uMnu Magubane.
Umnikazi wendaba, uNkz Ngcobo, wale waphetha ukuphawula.