SITHOLWE NESIKANINA ISIDUMBU SOKE
KUSIZE umakhelwane ukuze kutholakala izidumbu zamalungu omndeni wakwaNtozakhe eGamalakhe, ePort Shepstone, sezonakele, zivalelwe endlini, obesekuphele isonto lonke abafi bengabonakali.
Ukutholakala kwesidumbu sikaNkk Doris Ntozakhe (70) nesikaMnu Sfiso Ntozakhe (47) - oke waba ngomunye wababhali beGenerations - kwethuse kakhulu umphakathi wakule ndawo.
ILANGA lixoxe noMnu Mlungisi Ntozakhe oyindodana endala kaNkk Ntozakhe - kodwa engahlali kubo - othi ufonelwe ngumakhelwane ngoLwesihlanu ekuseni emazisa ukuthi sekunesikhathi esingaphezu kwesonto begcine ukubona unina nomfowabo, okuyinto engajwayele ukwenzeka.
Uthi umakhelwane umtshele ukuthi ngokujwayelekile uma unina nomfowabo behamba, bayaye bamtshele ukuthi banendlela ngeke babuye, bamcele ababhekele ikhaya, kodwa kulokhu wethukile uma ebona kushaya umoya egcekeni.
“Ngiphuthume ekhaya sazama ukugqekeza esangweni njengoba belikhiyiwe, okhiye behambe nabo ababulali. Sihlangatshezwe yiphunga singena esangweni. Ngifike omakhelwane sebewabizile amaphoyisa ngenxa yokuthi besezikhona izinto ezisolisayo,” kusho uMnu Ntozakhe. Uthi izidumbu zitholakale ngaphakathi endlini sezonakele, zimbozwe ngengubo yokulala.
“Nakuba singakazi ukuthi kwenzekeni, kodwa kuyacaca ukuthi umuntu obabulele uvulelwe yibona, akazange agqekeze ngoba akukho okukhombisa ukuthi kugqekeziwe. Sithole ukuthi ababulali bathathe imoto kamfowethu, izimpahla zasendlini okukhona kuzo umabonakude nezikhwama zabo ezinamakhadi asebhange," kusho yena.
Uthi unina ubenguthisha ngaphambi kokuba athathe umhlaphansi, manje ubesengusomabhizinisi enenqwaba yezindlu eziqashisayo. Uthi bebehlala bobabili nomfowabo.
Utshele ILANGA ukuthi indlela ezitholakale seziyiyona izidumbu, besekunzima nokubona ukuthi babulawe kanjani.
Okhulumela amaphoyisa KwaZulu-Natal, uCol Thembeka Mbhele, uthe kuvulwe amacala amabili okubulala. Bekungakaboshwa muntu, amaphoyisa asaphenya.