UPHUME NGEBHEYILI KWELOKUDLWENGULA
LIDEDELWE ngebheyili ka-R1 000 yiNkantolo yeMantshi yaseMatatiele ikhansela laseMatatiele, e-Eastern Cape, elibhekene necala lokudlwengula ivolontiya (27) leqembu lalo, i-ANC.
Lo mlisa (37) udedelwe ngeledlule ngoba inkantolo ithole ukuthi akayona ingozi futhi akayena umuntu ongalibalekela icala. Uzobuyela enkantolo mhla ka-5 kuNdasa (March).
Uboshwe emasontweni amabili edlule emuva kwezinsolo zokudlwengula owesifazane wasesigodini sakhe, iThabachicha. Kuthiwa uye kubo kwalona wesifazane sekuhlwile, wenza sengathi ufuna ukuzwa ngemibiko yamagatsha e-ANC, njengoba kulungiselelwa ukhetho.
Bahambile naleli volontiya beyoshiya elinye ilungu leqembu labo kubo, kuthiwa kuthe besendleleni ebuyayo, lo mlisa wenqaba ukuma ngakubo kwevolontiya lapho bekufanele lehle khona.
Kubikwa ukuthi uhambe nalo wayolidlwengulela esigangeni, eduze komgwaqo - emuva kokulivimba lizama ukujomba emotweni yakhe.
UNobhala we-ANC esifundeni sase-Alfred Nzo, uMnu Vukile Mhlelembana, uthe ukuthola kwekhansela ibheyili ngeke kwasishintsha isinqumo abafisa ukusithatha.
Kuzokhumbuleka ukuthi ngesikhathi ILANGA libika ngoLwesine olwedlule ngalolu daba, uMnu Mhlelembana uthe: “Ngeke silinde ukuphela kwecala elingase lithathe iminyaka, kodwa sizohlala sicubungule lo mbiko, sithathe isinqumo sokuthi mhlawumbe ake ame eceleni umsolwa, abhekane necala lakhe.”
Uthe nokho bayazi ukuthi ngokomthetho umsolwa usemsulwa kuze kube ulahlwa yicala, kodwa ngoba bafuna umthetho usebenze ngaphandle kokuphazamiseka, kuzofanele nawo bawunikeze lelo thuba.
* Ngakolunye uhlangothi, lihlehliselwe umhla ka-20 kuNdasa (March) icala lokubulawa kukaMnu Sindiso Magaqa owayeyikhansela leANC eMzimkhulu kanti wake waba ngunobhala-jikelele we-ANC Youth League isaholwa nguMnu Julius Malema.
Abasolwa abawu-5, okunguMnu Nkazimulo Kheswa, uMnu Khayalethu Njiyela, uMnu Zamokuhle Ndzimande, uMnu Melisizwe Tshazi noMnu Thembinkosi Tshazi, bayaliphika icala.
Imbangela yokuhlehliswa kwalo wukuthi inkantolo ifuna ukuhlala nommeli wabamangalelwa kubhekwe isibalo sofakazi kuleli cala.
Ngeke silinde ukuphela kwecala elingase lithathe iminyaka.