Indlela ophila ngayo ingazivimba izifo
MHLA ka-22 kuNhlolanja (February), wusuku lomkhakaso kahulumeni wokufundisa ngendlela yokuphila efanele, okuyinto evumelana kahle nenhloso yale ngosi egcizelela ukubaluleka kwendlela esiphila ngayo ukuze sigweme ukuhlaselwa kalula yizifo.
Namuhla sizothinta kafushane lezi zihloko ezilandelayo, okuyothi kamuva sinabe ngazo ngasinye:
Wukugqugquzela ukudla ngendlela efanele. Wukuzivocavoca njalo nje. Wukuxwayisa ngengozi yokubhema ugwayi.
Ukugwema uphuzo olunamandla nezidakamizwa.
nokugqugquzela ezokwenziwa kocansi ngendlela ephephile.
KUSHO UKUTHINI UKUBA NALOLU SUKU?
Ukuqoshwa kwalolu suku wuhulumeni akusho ukuthi abantu mabanakekele indlela abaphila ngayo ngalo kuphela, besekuthi wonke unyaka benze izinto ngobudedengu.
1. INDLELA ESIDLA NGAYO
Kunesisho esiyivangeli elishunyayelwa ngabasendimeni yezokwelapha, ngesiZulu esingasitolika sithi: “uba yilokho okudlile” ( you are what you eat). Lesi sisho sikuchaza konke ngomthelela wokudla esikudlayo empilweni imihla ngemihla.
Empeleni abakwezokwelapha bathi akusilona ihaba ukulibeka ngembaba elithi umsuka weningi lezifo usendleleni esidla ngayo.
Esinye isisho esiqukethe umqondo osondele kulesi, ngesashiwo nguHippocrates maqondana nokudla, esithi, “Let food be thy medicine and medicine be thy food” okusho ukuthi yenza ukudla kube yikhambi lakho, ikhambi lakho libe wukudla kwakho.
Njengoba kushiwo kule ngosi esikhathini esidlule, sekunezinhlangano ezinjengeFoods for Specified Health Uses yase-USA zocwaningo oluqhubekayo njalo ngosizo lokwelapha oluqukethwe yizinto esizidlayo. Nakwamanye amazwe ulwazi lwendabuko ngosizo lokudla okuthile ezinkingeni ezithile zokugula seluyahlonishwa manje.
Ngenxa yobubanzi balesi sihlokwana, namuhla sizokha phezulu ngalezo zinhlobo zokudla ezinconywa ngabomkhakha wezokwelapha ukuthi ziyasiza ukuba sihlale siphilile kahle.
Kulokho singajobelela ukuthi noma yini nxa yenziwa ngokweqisa iye igcine ingasalungile emizimbeni yethu. Lokhu okulandelayo yizinhlobo zokudla ezinconywa ngabezempilo ukuba zibe yingxenye yokudla esikudlayo nalezo okufanele sizigweme:
Qinisa kakhulu ekudleni izithelo nemifino ( vegetables);
Yidla inyama yenhlanzi, naleyo enamafutha emvelo njenge- sardine.
Nciphisa ekudleni okunosawoti omningi namafutha.
Nciphisa usawoti owufaka ekudleni okudlayo. Phuza njalo amanzi Ungaphuthi ukudla isidlo sasekuseni
2. UKUZIVOCAVOCA UMZIMBA
Kungani ukuvocavoca umzimba kusemqoka kangaka? Cishe bonke ongoti bezempilo bayavumelana ngobumqoka bokuzivocavoca njalo. Ngokusho kwabe-American Heart Association, lokhu okulandelayo ngeminye yemihlomulo yokuzivocavoca eyenza uhlale uzizwa ungumqemane: Kwehlisa umfutho wegazi. Kunciphisa amafutha emzimbeni ( cholesterol).
Kunciphisa isisindo somzimba noma ukuzimuka ngokweqile.
Kunqanda ukuba buthaka kwamathambo ( osteoporosis) - okwenza ephuke kalula.
Kusiza osenqume ukuyeka ugwayi ukuba ayeke kalula
Kunciphisa ingcindezi nokhwantalala.
Kusiza ukuba umuntu alale kahle. Kuvimbela isifo senhliziyo Kulekelela ekuthini igazi ligeleze kalula emzimbeni.
3. IZINKINGA ZOTSHWALA NEZIDAKAMIZWA
Ukusetshenziswa bededengu kophuzo olunamandla nezidakamizwa, kuyingozi kubo bonke abantu. Intsha kayisali ngaphandle kulokhu njengoba kuvamile ukuba kuholele ezenzweni ezinemiphumela emibi kuyona.
E-USA, kunocwaningo oselwaveza ukuthi intsha ephakathi kweminyaka ewu-15-24 ubudala, u-50% wayo ufa ngezingozi, ukushaywa ngenye (intsha) nokuzibulala; imbangela yalokhu kuba wutshwala nezidakamizwa.
Akugcini lapho, ukushaya nokudlwengula ngeminye yemiphumela ebikwayo. Lezi ngezinye zezimpawu zokungenisa kwezinkinga zalezi zinto:
Ukwehla kwezinga lemi phumela yokufunda. Ukuthola uhlobo olusha lwabanga
ni. Ukwedelela Nokuncipha kobudlelwano nezihlobo nabomndeni Kuyenzeka ukuba umuntu abonakale ngokuba namehlo abomvu, wukukhwehlela njalo nokuguquka kwezikhathi zokulala nendlela umuntu adla ngayo, nokunye.
4. UCANSI OLUPHEPHILE
Lokhu akugcini nje ngokuvikeleka kulezo zifo ezithintene noma ezingena ngokwenza ucansi, kodwa kuthinta nokuba uziqonde ukuthi ungubani, nezinga lobudlelwano phakathi kwezithandani.
Ukuhlolela izifo zocansi njalo kuyasiza ukuba ungatheleli abanye nokuba uzazi isimo sakho ukuze usheshe ufune usizo nxa kukhona okusolayo.
ISELULEKO
IsiZulu sithi kusinda ezakwaluvadlwana, ngakho kumqoka ukuba uthi unyaka usaqala umuntu ayinakekele ngazo zonke izindlela impilo.