CHEF ZANDI
SESIPHAKATHI enyangeni yothando, uNhlolanja (February) lapho abantu abaningi begubha usuku lothando, iValentine’s Day ngolwasemzini. Ukusondela kwalolu suku kubonakala ngisho nasezitolo ngezinhlobonhlobo zezipho nezimpahla.
Kuningi-ke ongakuhlela ngalolu suku njengokuthumela izimbali kothandiweyo wakho ekhaya noma emsebenzini. Kunezinhlobo zokudla ongazenza ngalolu suku.
Uma uzimisele ngokuchitha isikhathi nomndeni wakho noma nesinqandamathe sakho, yenza i- picnic.
Into enhle nge- picnic wukuthi ukwazi ukwenza izidlo ezahlukene kalula. Zenzele ubhasikidi (we- picnic) weValentine ngendlela elula. Qikelela ukuthi uzilungiselela kahle nge- picnic yakho, uma isimo sezulu sivuma ungayenzela epaki, ebhishi noma eyadini lakwakho uma unalo. Uma isimo sezulu singavumi, yenzele endlini, ulungise igumbi noma kube yisegunjini lokudlela. Qikelela ukuthi ingubo noma imicamelo kunombala obomvu nomhlophe, kube nezimbali, namakhandlela (uma usendlini); lokhu kusiza ekutheni nibe sesimeni esifanele nomuntu ozwana naye. Akuyona-ke i- picnic ngaphandle kokudla. Ngizocebisa ngezidlo ongazifaka kulo bhasikidi wakho, ezenza isimo sibe yile dlela oyifisayo nomuntu othandana naye:Ushizi ( cheese): Ukahle futhi izithako zakhona zinomsoco. Thenga izinhlobo ezahlukane zika- cheese oliqhuzu ukuze uwusike ngendlela oyithandayo - uyamelelana nesimo sokushisa kunalona osusikiwe. Izinhlobo ongazithenga yi- gouda cheese ne- cheddar cheese. Ungasebenzisa neMelrose le engamaqhuzu avaliwe, yinhle ngoba iyahlobisa uma usuhlela izidlo zakho. Ziningi-ke nezinhlobo zika- cheese ongazizama futhi yithuba elihle lokuzifundisa ngezinhlobo zawo uma imali ivuma. Iwayini/i- champagne/ sparkling juice: Uma nisebenzisa amponjwana, uhlobo lwewayani olukahle ngolubomvu ngoba kaludingi ukubandiswa futhi lwehla kahle no- cheese no- chocolate. Uma uthanda i- champagne, ungathenga yona ngoba nayo iyahambisana nalo mcimbi. Yinhle ngokuthi ungathenga enotshwala noma engenabo. I- sparkling juice ingasetshenziswa uma utshwala ningazwani nabo.
Izithelo: izithelo ezinjengamastrawberry, amagilebhisi, ama- cherry noma izithelo esichonywe endukwini ziyahambisana ne- picnic.
Ushokoledi: Ubalulekile u- chocolate uma uhleli nothandana naye. Iznhlobo zikashokoledi ziningi, zama ukudla i- dark chocolate ngoba yona kayiyinhle nje kuphela ngokunambitheka, kodwa inomsoco osiza ekutheni ube nesikhumba esihle, iyavikela ezifweni, isiza nasekuhambeni kwegazi.
Amasemishi: Kunezindlela eziningi zokwenza amasemishi. Ngenxa yokuthi lolu wusuku olubalulekile, yenza amasemishi anohlonze hhayi lawa ajwayelekile. Ungasebenzisa amabhanisi noma isinkwa usiqobe nge- cookie cutter etshengisa uthando.
Amakhekhe: Sebensisa ama- cupcake ahlukene, ungawenza amelele i- dessert, okanye usebensize noma yiluphi uhlobo lwekhekhe oluhambisana nawe.
Umuntu okumele avule ubhasikidi yilona obungazwayo. Faka izipho phakathi. Ningadlala nemidlalo yokuvala amehlo umuntu aqagele okuphakathi ebhokisini lesipho. Sinifisela usuku lwezithandani olumnandi.