Isidumo amaRoma exosha uFata
AmaKhatholika abethi awamfuni uFata Sokhela
KUPHAZAMISEKE ukuqala kwemisa amakholwa ebandla lamaRoma aKhatholika eMhlabashana, eHighflats, evuka inj'ebomvu exosha ufata okuthiwa ubeyokwethulwa nguMbhishobhi Pias Dlungwane, wesifundabhishobhi saseMariannhill, izolo ngeSonto.
ILANGA lithole ngamalungu ebandla abebhodla umlilo ethi kawamfuni uFata Vusi Sokhela - obephethe eNdonyane ngaphambi kokutshalwa eMhlabashana - amsola ngokuphatha imishini ngendlela ethandwa nguyena. Amsola ngokwenyusa imali yokungcwaba engavumelene nesigungu sebandla nokuthi uzithathela izinqumo engabonisananga namuntu ngezinto ezenzeka emishini.
Kuthiwa kunesigameko lapho eke waxosha izisebenzi zasemishini ngale kokuthi axoxe nesigungu, imishini kuthiwa uyiphatha sengathi yikwakhe. Amalungu ebandla athi ususwe eNdonyane nje, yingenxa yokuthi izinto bezingasahambi kahle, abazalwane bengasamfuni, kungasakhonzeki, indlu yesonto isiphenduke indawo yokuthetha amacala.
Kuthiwa abazalwane bashaye phansi ngonyawo bathi lingawa licoshwe yizinkukhu uma bengavumela uMbhishobhi Dlungwane ukuba amshiye uFata Sokhela.
UMbhishobi Dlungwane kubikwa ukuthi ufike ekuseni abazalwane sebevele bemlindile, bebhale nezingqwembe ezindongeni zebandla, ezithi kabamfuni uFata Sokhela. Bebemi izixongololo egcekeni lebandla bethi kabangeni ngaphakathi.
Kuphoqeleke ukuba kube nomhlangano ophuthumayo wesigungu esiphezulu, uMbhishobhi Dlungwane ezama ukukhuluma naso ukuba sizame ukwehlisa umoya emalungwini ebandla.
Kuthiwa ugcine evumile ukuthi ngeke esamshiya uMfu Sokhela, uzomzamela kwenye indawo njengoba bese kucacile ukuthi abazalwane baseMhlabashana kabamfuni nokumbona.
“Sigcine ngokubona imoto yakhe ingena esangweni, kasibange sisambona ukuthi uphelelephi. Usheshe wabona ukuthi isimo sishubile. Kasimdingi ebandleni lethu, besihleli kahle noFata Zenzele Gumbi oseyiswe eNdonyane. Simcelile umbhishobhi ukuba asilethele omunye ufata esizokwazi ukukhonza naye sikhululekile, ozokwazi ukusiphatha kahle njengoFata uGumbi.
“Ugcine evumile ukuthi uzosilethela. Okwamanje kukhona uFata Bongani Mkhize noMdikoni uThami Mnguni (okuyibona abayiso ebandleni),” kusho elinye ilungu elikhulume neLANGA.
ILANGA lizame lancama ukuthola uMbhishobhi Dlungwane ocingweni lwakhe - ukuze sithole kabanzi ngalolu daba - njengoba belukhomba ukuthi luvaliwe.
UFata Lindelani Madela, okhulumela leli bandla (kwisifundabhishobhi saseMariannhill), olwakhe belukhala lungabanjwa kanti nomyalezo athunyelelwe wona kuze kwashaya isikhathi sokuloba engawuphendulanga.