UBHODLA UMLILO UMQEQESHI WE-CHIEFS
Lshikiliswe kanzima ngama-amesha koweNedbank Cup
UDINWE uyaqhuma u-Ernst Middendorp, ongumqeqeshi weKaizer Chiefs, yisenzo sabadlali bakhe, njengoba ebasola ngokuba ngokhanda limtshelokwakhe.
IChiefs idlulele kanzima kwiquarter final yeNedbank Cup iguqisa ngo-3-0 iMagic FC edlala kwiSafa Western Cape ABC Motsepe League, izolo ngeSonto ntambama eNelson Mandela Bay Stadium, eBhayi.
IChiefs inqobe lo mdlalo kanzima kwazise ishaye amagoli ngesikhathi esengeziwe.
Igoli layo lokuqala kube yiphenathi ebekwe enethini nguDaniel Cardoso ngomzuzu ka-105, nelesibili likaPhilani Zulu alishaye ngoka-114, uKhama Billiat weza nelakhe ngoka120.
IChiefs inqobe lo mdlalo abalandeli sebedikibele kwazise bese ihluleke yancama ukushaya igoli emizuzwini engu-90 yokuqala, njengoba imbobo ivuleke esikhathini esengeziwe.
UMiddendorp ushiye angalazi kubadlali bakhe njengoba ebasola ngokuba ngokhanda limtshelokwakhe.
“Sinqobile impela kodwa lo mdlalo ungidumazile. Empeleni ungicasulile, sizoshikiliswa ngabantu abadlala esigabeni esiphansi kunesethu.
"Into engidine kakhulu wukuthi kasidlalanga ibhola ebesilihlelile, sivele sadlala amabhola amade ngenxa yabantu abafuna ukuzenzela okwabo. Sithole inqwaba yamathuba sangawasebenzisa, kunalokho sawamosha.
“Iyacasula indaba yokumosha amathuba kanjena, le nto izosilimaza uma sesidlala nontanga yethu. Iyihlazo le nto eyenzekile, kakufanele nje ikilabhu enkulu njengeChiefs inqobe kanzima kanjena kuma-amesha. Kulo mdlalo sibe yizitha zethu uqobo,” kusho uMiddendorp obebonakala ukuthi ucasukile.
UGeorge Dearnaley ongusomaqhinga weMagic, uncome ikilabhu yakhe ngokudlala ngokuzinikela.
“Sibulawe wukukhathala kulo mdlalo, ngaphandle kwalokho besiwubambile. Ngiyababongela abafana bami, ukuya neChiefs esikhathini esengeziwe kakusiyona into encane, sisebenzile, bayalidinga ihlombe,” kusho uDearnaley.
Umdlalo uqale ngegiya eliphezulu iChiefs icindezele kubonakala ukuthi idlala esigabeni esiphezulu kuneMagic. UHappy Mashiane ubezenzela ophondweni lwesobunxele egoba amabhola amahle kodwa abagadli beChiefs behluleka wukuwavalela enethini.
Ngomzuzu ka-14, uGeorge Maluleka uke wathumela inguzunga yeshodi ephume kancane eceleni kwamapali.
IChiefs icishe yajabulisa abalandeli bayo uHendrick Ekstein ephuma uqekelele kodwa ibhola waliqhuba kakhulu laze lathathwa ngunozinti weMagic.
Akuphelanga sikhathi esingakanani uRyan Moon waficwa yibhola emi yedwa ebhokisini lezitha wathi ulibeka enethini langqubuza ipali labuyela ensimini walibamba unozinti weMagic kwaba wukusinda kwayo.
NeMagic ike yanyakazisa inkundla uDanian Wareley ethola ibhola wathumela inkunzimalanga yeshodi kodwa wayibamba uBruce Bvuma. Kuphele imizuzu engu-25 ingekho efuna ukugoba uphondo.
IChiefs izamile ukucindezela iMagic kodwa ingavumi ivalile emuva. Kuyiwe ekhefini zibambene ngo-0-0. IChiefs ibuye ngesiwombe sesibili kucaca ukuthi idiniwe njengoba ikhiphe u-Ekstein yafaka uBilliat. Iqhubeke lapho ebigcine khona ingenisa ngamandla emapalini eMagic.
Ngomzuzu ka-62 uBernard Parker ungqofelwe ibhola nguLeonardo Castro lamfica emi yedwa ebhokisini elincane washaya ishodi kodwa lavinjwa ngunozinti weMagic.
Ngomzuzu ka-65 uWayde Crowie uke wavusa iMagic ethola ibhola esebhokisini wathumela imbumbulu yeshodi engamakwe muntu yaphuma phezu kwamapali.
Isiyonke imiphumela yemidlalo ye-last 16 yeNedbank Cup: Magic 0, Chiefs 3; Cosmos 0, TS Galaxy 1; Celtic 1, Richards Bay 0; Chippa United 2, Tshakhuma Tsha Madzivhandila 0; Arrows 2, Spurs 1; Cape Town City 3, Highlands Park 0; Cape Umoya United (0) (4), Mbombela United (0) (2).