BAZOTHATHELWA IZINYATHELO ABANTSHONTSHA UDIZILI
ZIPHENYWA ngenkohlakalo yokudayisa udizili nokusetshenziswa budlabha kwezimoto zomkhandlu, izisebenzi zikaMasipala wesiFunda uMzinyathi.
Lokhu kuvele ngoLwesihlanu ngesikhathi lo masipala uhlangene ohlelweni lwezinsuku ezintathu, olubizwa ngeStrategic Planning Session, obeluseBattlefield, eDundee. L amacala aphenywayo kuthiwa enzeke emphakathini lapho kusuke kuhanjiswa khona amanzi.
Umkhuba wokumoma udizili kuthiwa wenziwa yizisebenzi ezithile nabanye abasuke beqashwe yizinkampani ukuba bahambise la manzi emphakathini.
Udizili lo kuthiwa usuke uhleli ezindaweni zazo izinkampani ngoba ngeke uhlale kude nalapha zisebenzela khona.
IMeya yaseMzinyathi, uMfu uPetros Ngubane, izwakalise ukukhathazeka ngalo mkhuba. “Kusiphethe kabi ukubona abantu beswele amanzi ngenxa yale nkohlakalo. Sinxusa umphakathi ukuba ubike izigameko uma zenzeka. Uma kuntshontshwa lo dizili, ama- pump adonsa amanzi phansi asebenza ngawo, kuphazamiseka ukusebenza. NgoKhisimusi nangoNcibijane, abantu bebengenawo amanzi.
"Sinxusa imenenja (uSipho) Ndabandaba ukuba iqinise isandla, kulwiwe nalesi sihlava,” kusho uMfu Ngubane. UMnu Ndabandaba ukuqinisekisile ukuthi zikhona izinyathelo ezizothathelwa izisebenzi zikamasipala.
“Kunemithetho elandelwayo ngaphambi kokuba kuthathwe isinqumo uma kuwuthi kukhona othintekayo. Uphenyo lubheka ukuthi ngabe lona osolwayo ukwenzile ngempela yini asolwa ngakho noma uyabhecwa.
"Uma kuliqiniso, luyaqhutshwa uphenyo, othintekayo amiswe noma axoshwe. Kuyasijabulisa ukuba nohlelo olufana nalolu lapho sisuke sihlanganisa amakhanda, siqhamuke namasu okuthi singazihambisa kanjani izidingo emphakathini. Kuningi okuhle okwenzekile selokhu siluqalile lolu hlelo ngonyaka odlule,” kusho uMnu Ndabandaba.
IZISEBENZI EZITHILE ZIMOMA UDIZILI NALABO ABAQASHIWE.