Bayakhala ngemithetho yakwaShembe
Amadoda athi izofe**sa amakhosikazi awo
AKHIHLA isililo amadoda ebandla lamaNazaretha ohlangothini lwaseBuhleni, oluholwa yiNkosi Mduduzi “Nyazilwezulu” Shembe ngemithetho ehlongozwa yibandla, eminye yawo emayelana nezitabane, athi izofe**sa amakhosikazi awo.
Kule mithetho - okuthiwa ishaywe ngabefundisi baleli bandla - kukhona othi uma indoda ingenwa wumoya wobutabane, umfazi unelungelo lokuyishiya abuyele kubo, futhi usekhululekile ukuthi angagana enye indoda.
Ngokwalo mthetho, uma umfazi esebuyele kubo, kufanele agezwe ngembuzi ngaphandle komuzi, aphinde amukelwe ngenye esengena emagcekeni akubo. Emuva kwalokhu, lowo mfazi usengathathwa ngenye indoda.
Uma besebenezingane, leyo ndoda entsha emthathayo lowo mfazi, kuyomele ikhiphe izinkomo ezimbili iziyise kubo kwensizwa eyisitabane, kodwa uma bebengakabi nazo izingane, kuyokhishwa izinkomo ezine bese beshadiswa ngokusemthethweni.
Izinhlalisuthi zaleli bandla kaziwufuni nokuwuzwa lo mthetho njengoba zithi uzokwenza zilahlekelwe ngabafazi bazo. Enye inhlalisuthi ekhulume neLANGA, kodwa ecele igama layo ligodlwe, ithi uma umfazi ezizwa engasayithandi indoda, usengavele ayibhece ngobubende inyama ingayidlanga, athi usesola umoya wobutabane kuyona.
“Abafazi uma sebevukwe wubuf**e sebezosidelela nasemakhaya, uma uke wamsola ngalokho, avele aqoqe imithwalo abuyele kubo bese ekuqambela amanga ethi usungenwe yilo moya kanti usefuna ukuya kwanhliziyo ngise. Baningi kabi abafazi lapha ebandleni abakhethwa emabhentshini ngamadoda aseqinile, okuthi uma sebehleli nawo, sebeganene, babone amadoda angontanga yabo ezidlisa satshanyana besebefuna ukuwashiya amadoda abo.
“Ukuphasiswa komthetho onjengalo, kuzoyibhidliza imizi eminingi, kwenze abantu bagcine sebebulalana ngoba kayikho indoda engavuma ukwephucwa umfazi wayo ngenye besekuba sengathi kakwenzekanga lutho,” kukhala le nhlalisuthi.
Lo mthetho kawugcini ngokushaya kwabesilisa, nabesifazane abathandana nabanye besifazane ugadlile kubona. Uthi uma inkosikazi isingenwe wumoya wobutabane iyophucwa ilungelo lobukhosikazi ebandleni, impilo yayo yonke. Okusho ukuthi ngeke isaba yilungu lomhlangano ka-14 - okuyinkonzo yomama engena mhla ka-13 iphume mhla ka-14 njalo ngenyanga - ibuyela edukwini elimhlophe.
Kule mithetho kukhona nothi uma inkosikazi ishonelwa yindoda isencane, kuzonikwa umndeni ithuba lokuba ubheke ukuthi akekho yini kuwona ozoyingena. Uma engekho, iyobe isinikwa ilungelo lokuthola enye indoda ngaphakathi esontweni ngokuzikhethela kwayo (leyo nkosikazi).
Okhulumela amaNazaretha aseBuhleni, uMnu Thokozani Mncwabe, uyihlabe wayihlikiza indaba yalo mthetho njengoba ethi wonke amaNazaretha kawahambisani nawo, hhayi amadoda kuphela.
“Ibandla lethu liyisibuko sezwe, abantu babalekela kulona ngoba lisamile emithethweni yalo eqhakambisa isintu nesiko. Thina sazi ukuthi izindaba zamalobolo zikhulunywa wumndeni, ibandla kalingeni ndawo kuwona, lingena kuphela uma kufakwe icala kulona.
“Okunye umfazi akagani okwesibili indoda yakhe yokuqala isaphila. Noma ngabe uphingile umfazi, akaxoshwa, wakhelwa umuzi wakhe eceleni indoda ilokhu iyombheka kulowo muzi wakhe ngoba kabahlukani abantu abaganene, baze bahlukaniswe wukufa. Uma sekukhona imithetho enje, abantu bazobalekela kuphi ngoba nathi sesiyafana nje nabanye,” kusho uMnu Mncwabe.
Uze walinganisa nangokuthi eSihlabelelweni samaNazaretha isigatshana 39, sithi ungaboyibheka inkosikazi yomuntu, “okusho ukuthi siphikisana noMqaliwendlela uma sivuma le nto, kuyobe sekuyiGomora”.
UMfu Mbingwa Nzama - okubhalwe ebhukwaneni lale mithetho ukuthi ubekhona ngesikhathi ihlongozwa - uthe ngesikhathi besentabeni iKhenana ngoMasingana (January), ziningi izinto abakhulume ngazo.
Uthi nale yobutabane wudaba abaluxoxile futhi bengaqali ukuluxoxa njengoba luhlale luvuka, kodwa bagcine belushiya lulenga ngenxa yokuthi abantu sebephakanyelwe yimimoya.
“Ukuluxoxa kwethu bekungasho ukuthi sithi lo sekuwumthetho ophasile. Umthetho uyophasa uma sewethuliwe ebandleni lawemukela ngoba ushayelwa lona. Ziningi izinto esikhulume ngazo esibonayo ukuthi indlela ezenziwa ngayo kayisahambisani nesikhathi esiphila kusona, kodwa ngoba ibandla lethu linabantu abadala nabasha, ezinye zalezi zinto kusazothatha isikhathi ukuba zishintshwe ngoba uma sithi siyazixoxa kuvele kuphakame imimoya, sigcine singafikanga ndawo nazo njengale yobutabane ekade sasiyixoxa kodwa uthole ukuthi kayiqedeki,” kusho uMfu Nzama.