BAJABULILE ABEFUNDISI BEVUNWA YINKANTOLO
BATHI liphume nobomvu bevunwa yiNkantolo yesiFunda yaseMgungundlovu abefundisi ababili base-African Gospel Church, abebefake isimangalo ngokuxoshwa kwabo ngaphandle kwezizathu ngu- moderator webandla, uMfu Alpha Mbili.
Laba befundisi abakhishwe phambili yinkantolo ngoLwesithathu olwedlule, bangaphansi kohlangothi olwaxebuka noMfu Petros Zimu, emuva kokuba leli bandla lihlukene phakathi ngo-1997, kwaba khona uhlangathi oluholwa nguNontu Gigaba noluholwa nguMfu Zimu.
UMfu Sakhephi Ndaba, oxoshwe kwesokuba ngumengameli wesifunda sebandla KwaZulu-Natal - sanikwa uMfu Micah Tembe - noMfu Mashing Dlomo osuswe eKranskop washovelwa eMgungundlovu, bahluleke ngisho wukuzibamba yinjabulo njengoba inkantolo ithe mababuyele ezikhundleni zabo.
Inkantolo ibavune emuva kobufakazi obethulwe ngummeli wabo, uMnu Collin Mnguni weCollin Msizi Mnguni Incorporated, oveze ukuthi uMfu Dlomo uze ayiswe eMgungundlovu nje, yingoba ecelwe yilona ibandla ukuthi ayoxazulula izinkinga ebezikhona njengomfundisi omdala.
Ubezobuyiselwa ebandleni lakhe laseKranskop uma sezixazululekile, okuthe sekufanele bamphindisele, benqaba bathi sebemshovela emishini yebandla eseMambulu, khona eKranskop.
Ngokwamaphepha abefakwe ngummeli walaba befundisi enkantolo, lokhu bekungekho emthethweni ngoba ngokomthethosisekelo webandla, umfundisi ushintshwa kuphela uma kuhlale ingqugquthela yebandla, akavele atshelwe ngabantu ababili abafika ehhovisi lakhe bathi sesikushovela laphaya.
Ekhuluma neLANGA uMfu Ndaba, uthe kubajabulise kakhulu ukubuyiselwa ezikhundleni zabo ngoba vele baze bakhishwe nje, bekungekho olubi abebelwenzile, bebesukelwa nje.
“Ukubuyela kwethu kuzonika nabanye abahlukunyezwe yileli bandla ithemba ngoba baningi abebengahambisani nendlela esixoshwe ngayo. Ukubuya kwethu kuzosheshisa nohlelo lokukhethwa kobuholi obusha kuleli bandla, bakhishwe laba abakhona ngoba kuyacaca ukuthi umsebenzi wabo wokusihola ubehlulile njengoba bebevele bezwe ukuthi kabasakufuni bese bekushintshela kwenye indawo ngaphandle kwesizathu,” kusho uMfu Ndaba.