Kudlwengulwe ingane (4) ibuya enkulisa
KUNOVALO emphakathini waseBomvini, eNgwavuma, emuva kokunukubezwa ngokocansi kwentombazanyana (4) ibuya enkulisa ngoLwesine.
Kubikwa ukuthi lesi sigameko senzeke emuva kokuba le ngane ihlukane nezinye ehamba nazo - sekuhlukana izindlela. Kuthiwa ihamba ibanga eliwu-1 km uma iya noma ibuya enkulisa, okuyindawo enamahlathi.
Kuthiwa nabadala bamanqika ukuhamba kuyona. Kuvela ukuthi ingane ibhudukezwe ngowesilisa obeluse izinkomo kulelo hlathi. Kubikwa ukuthi wenze lokhu maqede wayikhomba indlela eya kubo. Lesi sigameko sethuse abaningi njengoba kuvele ukuthi baningi abangazinaki izingane zabo kule ndawo.
Ezinye zazo zigcina seziwumthwalo wothisha abazifundisayo. “Simangele uma sithola imibiko yokudlwengulwa kwengane la emphakathini. Okubuhlungu wukuthi ingane kayimazi umuntu oyigilil, ngaphandle kokuthi ubeqhuba izinkomo.
"Sihlala silukhuluma nasezinkundleni udaba lokuthi mazibhekwe izingane uma ziya noma zibuya esikoleni. Kangisayiphathi-ke eyenkulisa. Umuntu ohluleka wukubheka ingane yakhe efundayo futhi azitshela ukuthi uyatshala kuyona, ukhombisa
ukuyizonda. Akekho ozovuma ukuthi nguye ogile le ngane. Nabantu siyabanxusa ukuba babuyelwe wunembeza ngoba kuwubulwane nje ukuthi usungaze udlwengule ingane encane ngalolu hlobo, ekubeni izintombi ziziningi kangaka,” kusho ilungu lomphakathi.
Induna yendawo, uMnu Abraham Mabuyakhulu, ithe iphoxeke kakhulu uma ithola imibiko yokuthi kudlwengulwe ingane encane. Ithe kuwumsebenzi wabazali ukuqinisekisa ukuthi izingane ziphephile ngaso sonke isikhathi.
“Nginxusa abazali ukuqinisekisa ukuphepha kwezingane emakhaya. Okwenzekile kuyichilo futhi akwemukelekile nasendaweni. Sethembe ingalo yomthetho ukuthi izoba nophenyo olungaholela ekubeni kuboshwe isigilamkhuba. Ibuhlungu le nto ngoba selilimele nje nekusasa lengane,” kusho uMnu Mabuyakhulu.
Okhulumela amaphoyisa KwaZuluNatal, uLt Colonel Thulani Zwane, usiqinisekile lesi sigameko. Uthe akukaboshwa muntu. “Kuvulwe icala lokudlwengulwa eliphenywa esiteshini saseNdumo.
"Kudlwengulwe ingane eneminyaka emine ngumelusi thizeni, oyibambe endaweni eyihlathi. Amaphoyisa aseNdumo ayaqhubeka nophenyo olungase luholele ekubeni kubanjwe umsolwa,” kusho uLt Colonel Zwane.