Kusuke uthuthuva esigcawini sabeNFP
Intatheli yeLANGA ibuze ukuthi izongenela kuziphi izifundazwe
KUSUKE esinamathambo esigcawini sabezindaba seNational Freedom Party (NFP), ebesise-Onomo Hotel, eThekwini ngoMgqibelo, kubangwa udaba lobuholi baleli qembu KwaZulu-Natal, oselubuya nasezinkantolo.
Inhloso yalesi sigcawu - sesigungu esiphezulu seNFP ebesiholwa ngumengameli wayo, uNkk uZanele Magwaza-Msibi, bekuwukwethula izinhlelo zaleli qembu njengoba kuyiwa okhethweni uMengameli Cyril Ramaphosa amemezele ukuthi lumhla ka-8 kuNhlaba (May).
Leli qembu limemezele nokuthi mhla ka-31 kuNdasa (March), liyokwethula umhlahlandlela walo wokhetho, eCecil Emmett Stadium, eVryheid.
Umsindo usuke ngesikhathi intatheli yeLANGA ibuza ukuthi ngubani usihlalo weNFP KwaZulu-Natal, nokuthi izolungenela kuziphi izifundazwe ukhetho.
Phambilini kuqubuke umbango wezikhundla kuleli qembu, okudale ukuba kube khona abeseka uNkk Magwaza-Msibi, abanye beseka uNkk Sindi Mashinini-Maphumulo, oqembukele kwi-UDM ngenyanga edlule. Inkantolo ihlakaze zonke izigungu zaleli qembu, yathi kumele kwakhiwe ithimba labantu abane uhlangothi ngalunye, ukuze iNFP ikwazi ukuthatha izinqumo.
UNkk Happy Khuzwayo, ongusihlalo weNFP Women’s Movement (NFPWM), uthe ubuholi bonke obabukhethwe engqungqutheleni kazwelonke ngo-2011, busami njengoba babumile, azikabikhona izingququko, kuzoze kube nenye ingqungquthela ngoZibandlela (December) kulo nyaka.
Uthe uMnu Vikizitha Mlotshwa nguyena osengusihlalo weNFP KwaZulu-Natal. UMnu Nhlanhla Khawula, oke waba ngusihlalo waleli qembu eThekwini, uthukuthele wagana unwabu ngale mpendulo kaNkk Khuzwayo.
“Kasimazi lowo (uMnu Mlotshwa), yinto engekho leyo. Ngokomthetho nesinqumo senkantolo, kumele kwakhiwe ithimba elizothatha izinqumo zeqembu esifundazweni.
"Bacabanga ukuthi basazoqhubeka badle imali ngento esayisungula ngezithukuthuku zethu, labo abafuna ukuba ngoboy boMlotshwa? Mina ngeke, ngisembonini yamatekisi angesabi muntu,” kusho uMnu Khawula.
Ube esechaza ukuthi into eyadala ukuba iNFP ingalungeneli ukhetho lohulumeni basekhaya ngo-2016, kungenxa yengxabano yobuholi baseThekwini.
“Bonke abantu bathwala kanzima nje, kulokhu kuthiwa kungenxa kaMnu Nhlanhla Khubisa noShelembe (Maliyakhe). Akunjalo, yingoba ngasuke ngabangiswa ngumama uGwala noMshazi (kukhethwa ubuholi), lapho ngafike ngazidlela amahlanga, ngawina ngaba ngusihlalo wesifunda eThekwini,” kusho uMnu Khawula.
Obambe njengosihlalo kuzwelonke kwiNFP, uMnu Bhekithemba Dlamini, uthe yonke into ihamba kahle eqenjini, likulungele ukuya okhethweni lizongenela kuzona zonke izifundazwe.
“Ngiyezwa kuthiwa kunokungaboni ngaso linye ebuholini besifundazwe nobukazwelonke, yinto engekho leyo. I-NEC ekhona yiyona ethatha izinqumo zokulungiselela ukhetho.
"Sisebenza ngendlela, siyaxhumana uma kukhona la kumele silungise khona, “kusho uMnu Dlamini.
UMlotshwa udla imali ebalelwa ko-R27 million.