Libulawe liyosiza iphoyisa ebelilele
Lizwe umakhelwane walo ememeza, ecela usizo
“Baze
ZIYAQAQAMBA izinhliziyo emndenini wephoyisa elidutshulwe labulawa kade livuswe wumhayizo obuqhamuka kwamakhelwane walo - lilele nesinqandamathe salo - becela usizo kungena izigebengu e-Unit 14, eMbali, ngezithuba zehora lesibili ekuseni, izolo ngeSonto.
Umndeni kaSgt Njabulo Ngcobo (40), obesebenzela eTownhill Police Station, uthi kakuvumi nokuthi udle emuva kwalesi sigameko.
Ekhuluma neLANGA uninalume kamufi, uMnu Bonga Shelembe, uthe umshana wakhe uphashanyiswe umsindo kwamakhelwane wakhe, bebemeza bethi: “Njabulo, Njabulo sisize safa”.
Uthi uvuke lapho wadonsa izulu lezandla wanikela khona.
“Isinqandamathe sakhe kasizange siphume ukuyobheka ukuthi ubizelwani ngenxa yokwesaba. Uma sichaza, sithi akuphelanga mizuzu engakanani uNja- bulo ephumile, sezwa sekuqhuma isibhamu. Sisola ukuthi uhlangane nezigebengu sezibaleka zavela zamdubula esayongena endlini, waphelela khona lapho,” kusho uMnu Shelembe.
Emchaza, uthi ubengumuntu obezilungele futhi ekhuthele.
“Ubebuya njalo emsebenzini abe matasa nebhizinisi lakhe lokudayisa izinto zasendlini ezingamasekeni, ezisebenza ngogesi,” kuchaza uMnu Shelembe.
Ozakwabo bakaSgt Ngcobo bathe bafe olwembiza ngokushona kwakhe njengoba ebewusizo futhi ewuthanda umsebenzi wakhe.
Uzakwabo obesondelene kakhulu naye ngokomsebenzi, igama lakhe esiligodlile njengoba engavumelekile ukuphawula kwabezindaba, uthi namanje kabakholwa ukuthi uSgt Ngcobo akasekho emhlabeni ngoba bagcine ukubonana naye ngoLwesine emsebenzini ezoze angene ngoLwesibili ekuseni.
USgt Ngcobo ushiye abantwana abathathu emhlabeni.
Okhulumela amaphoyisa KwaZulu-Natal, uLt Colonel Thulani Zwane, uthi okwamanje akukaboshwa muntu ngalesi sigameko, amaphoyisa asaphenya.