Umkhiqizo wecholocholo (bush tea)
UMabaso ufikelwe wumbono wokuzitshalela leli tiye
IQHAMUKA nomqondo ophusile insizwa yaseMpophomeni, eHowick, enguMnu Siphamandla Mabaso (26) wokukhiqiza itiye lecholocholo ( bush tea), okubikwa ukuthi liyasiza ezinkingeni ezithile emzimbeni.
Empeleni lolu wuhlobo oluthile lwesimila amaZulu asisebenzisa ukwenza imishanelo, ngesiNgisi kuthiwa yiBushman's tea (itiye labaThwa), ososayensi balibiza nge- Athrixia phylicoides, inkundla yezokuxhumana yeSouth African Biodiversity Institute ilichaza njengekhambi elikhula libe wu-1m ukuya phezulu namakhasi alo ampunga ngokuphaphathekile futhi abushelelezi.
Kuthiwa abaThwa babelisebenzisa leli khambi ukwenza isiphuzo (itiye) kanti amaVenda nabeSotho bona bayaliququda ukuqeda ukukhwehlela nomphimbo obuhlungu. Ngaphandle kwalokhu, liyasiza futhi konezinkinga zesikhumba njengezinduna, nokupholisa izilonda ezincane.
USIPHAMANDLA MABASO
UMnu Mabaso ungumsinsi wokuzimilela eMpophomeni, ufunde khona wadlulela eHowick High School ukuyofunda imfundo yamabanga aphakame.
Uke wathi xhakalazi iminyaka emibili enguweta kwenye indawo yokudlela edolobheni eHowick, washiya lapho kudilizwa izisebenzi. Usebenze isikhashana emnya- ngweni wezokuthuthukiswa komphakathi waze wayeka ngoba eseyokwelekelela uyisemkhulu emsebenzini wengadi yomphakathi ekhaya eMpophomeni.
UTHANDO NOCWANINGO NGOKULIMA
UMnu Mabaso ukhulele emndenini oziphilisa ngokutshala, ube eseqala ukutshala amazambane endaweni ewu-2 hectares. Kamuva wenze ucwaningo endimeni yezoli- mo, wayesenquma ukuba alime ngendlela yemvelo (organic farming) - angasebenzisi amakhemikhali - kusho ukuthi nezitshalo zakhe uzondla ngemvundiso esikhundleni sikamanyolo.
Mayelana nokubulala izinambuzane, utshele ILANGA ukuthi sewazitholela indlela yemvelo lapho ezenzela khona okokufutha izitshalo zakhe esebenzisa ulamula, ugwayi wenqawe namanzi.
UYAZITSHALELA
Waqaphela ukuthi itiye leli limila ezindaweni ezingamagquma, ezi- ngenawo amanzi amaningi.
Ufikelwe wumbono wokuba azitshalele yena endaweni yakhe leli tiye. Uqale ngokutshala izithombo esikhundleni sembewu. Uthi lokhu ukwenze ngokuthatha lezi zithombo endaweni yazo yemvelo nenhlabathi yazo bese eyozitshala ensimini yakhe, uthi kaziyona inkinga ngoba kazidingi ukuniselwa.
Usethole nokuthi izihlahla zaleli tiye ziqhakaza nini, okuholele ekubeni akwazi ukuthola imbewu bese ezitshalela yena ngaphandle kokuphuma aye eqeleni. Usatshale imigqa embalwa yezihlahla kwazise usezwa amanzi ngobhoko, kodwa asekubonile wukuthi i- bush tea iyavuma endaweni yakhe.
IPHUPHO LAKHE
Ngesikhathi ILANGA lixoxa naye, lithole ukuthi ubehambele emahhovisi e-Agribusiness, eMgungundlovu ukuyokwethula amasampula aleli tiye ukuba lihlolwe.
Uthi wethemba ukuthi konke kuzophetha ngokuba livivinywe yizinhlangano zocwaningo njengeCouncil for Scientific and Industrial Research (CSIR) noma yiSouth African Bureau of Standards (SABS), ngenhloso yokuthola ilungelo lokuhweba ngalo mkhiqizo ngokusemthethweni. Nxa konke kuhambe kahle, yena nabasizi bakhe ababili banethemba lokuba babe nenkampani enohlelo lokukhangisa imikhiqizo egoqwe ngokunophawu lwenkampani ( branding) olucacile nesitifiketi sokusebenza.
UNkz Naledi Majozi, ongomunye wababambisene noMnu Mabaso kulo mbhidlango we- bush tea, ubona kunethuba leminye imikhiqizo yaleli tiye ephathelene nezokubukeka kahle, nokho okusazokwenziwa ucwaningo ngayo.
Ukuphumelela kocwaningo sekuyobabeka emgqeni wokuba bethule isu lokuqhuba umsebenzi ( business proposal) kulabo abangase babasize ngemali yokuxhasa umsebenzi, ikakhulukazi ingqalasizinda yawo phakathi kokunye okuzoba yisakhiwo seFarm Stall, izimpawu ( signage) ezikhomba lapho leyo farm stall yakhiwe khona.