OweTheku uqinise isandla kolomhlaba
KULIQINISO elingephikwe ukuthi uMasipala weTheku ungomunye wabahamba phambili ekuhlinzekeni ngezindlu zamahhala nezibiza kancane eNingizimu Afrika.
Kusukela ngo-1994 ziwu-200 000 izindlu esezakhiwe, ezingamakhaya kubantu abevile ku-1 million. Nakuba isimo semali singesihle, umasipala wethu uyaqhubeka nezinhlelo ezahlukene zezindlu.
Okuhle kakhulu wukuthi uma sizakha lezi zindlu, senza isiqiniseko sokuthi zinamanzi, ugesi ngokunjalo nezindlu zangasese.
Lo msebenzi wethu omuhle kangaka sewenze ukuba sande isibalo sabantu bakithi abathutheleka eThekwini. Iningi labo lidabuka ezindaweni ezisemakhaya nasezifundazweni ezahlukene, ukuzofuna impilo engcono namathuba okuziphilisa.
Iqiniso wukuthi umasipala wethu kawuzukwazi ukuhlinzeka bonke abantu bakithi ngezindlu ngesikhathi esisodwa. Lokhu sekuholele ekubeni zande izigameko zokudliwa komhlaba, okuyinto engekho emthethweni.
Sikhuluma nje, uphiko lwethu umsebenzi walo okuwukulwa nokudliwa komhlaba, phecelezi iLand Invasion Unit, luhlale luthwele kanzima mihla yonke.
NgoMfumfu (October) 2018, lulwe nezigameko zokudliwa komhlaba eziwu-95, ngoLwezi (November ) zibe wu-97 kanti ngoZibandlela (December) zibe wu-43. Njalo ngonyaka wemali, lolu phiko luhlinzekwa ngezigidi zamarandi ukulwa nalesi sihlava.
Yimali lena okufanele ngabe isetshenziselwa ezinye izinhlelo zentuthuko ukuba kazikho izigameko zokudliwa komhlaba.
Okusibangela izinkinga kakhulu, wukuthi kunabaholi bezepolitiki nabezinhlangano ezingekho ngaphansi kukahulumeni ababhebhezela ukuba kuphulwe umthetho, kuthathwe umhlaba (ngesankahlu).
Kubuhlungu kakhulu lokhu ngoba laba baholi bayazi ukuthi abantu bakithi badinga umhlaba, bazolalela noma ngubani othi mabaphule umthetho. Sikugxeka kakhulu lokhu ngoba kubanga ukuba kungabi nozinzo kumasipala wethu njengoba sekuyinsakavukela umchilo wesidwaba ukuthi kube nokubhekana ngeziqu zamehlo phakathi kwezisebenzi zethu nalabo abadla umhlaba.
Ngakho sinxenxa bonke abaholi ukuba bangasebenzisi ukuhlupheka kwabantu bakithi ngenhloso yokuzuza kwezepolitiki, kwazise sezihubela sakusha ngokhetho. Lokhu futhi kwakha isithombe esingesihle ngomasipala, ngokunjalo nezwe lonkana kula- bo okungakube bafisa ukuzotshala imali eThekwini. Sicela abaholi bamasonto, abezepolitiki, abezinhlangano ezizimele nabanye ukuba basilekelele ekubeni abantu bakithi bafundiswe ngobungozi balesi senzo.
Uma singakwenzi lokhu, ngeke kugcine nje kuba nomthelela omubi kuMasipala weTheku, kodwa sonke sizothola amachaphazelo ngoba kuyogcina sekuhambe amabhizinisi amakhulu, kuphele kwayona le misebenzi eyingcosana.
Yebo, siyawuqonda umlando wethu mayelana nodaba lomhlaba, kodwa kubalulekile ukuba sinike uhulumeni wethu kuzwelonke ithuba, usihole odabeni lomhlaba. Masilinde kuphele umsebenzi owenziwayo kuzwelonke ukwakha izinhlaka zokuthi umhlaba ugcina wabiwe ngokulinganayo.
Uma siqhubeka nokungahloniphi izinhlelo zikahulumeni mayelana nodaba lomhlaba, sizoba nenkinga enkulu kakhulu ngomuso uma kuziwa kwezomnotho ngoba iqiniso wukuthi akukho lapho kwake kwasimama khona umnotho lube lungekho uzinzo.
Siwumasipala onakekelayo, kodwa ngenxa yokudlanga kwezigameko zokudliwa komhlaba, sinqume ukuthi bajeze kanzima labo abadelela umthetho.
Sizokwenza isiqiniseko sokuthi izaphulamthetho ziyaboshwa, ngeke zigcine nje ngokuba sidilize izakhiwo ezingekho emthethweni. Sikhuluma nje bakhona abawu-22 ababoshiwe emuva kwezinye zezigameko ezingekho emthethweni zokuzithathela umhlaba.
Lokhu kukhomba ngokusobala ukuthi itshe seligaya ngomunye umhlathi. Kulabo abanomhlaba okungakhiwe lutho kuwona, siyacela ukuba bawubiyele. Ngokomthetho, i-Occupation of Land Act 19 ka-1998, kuwumse- benzi womninimhlaba ukubiyela indawo yakhe.
Uma udliwa umhlaba, umnikazi unelungelo lokuyovula icala besekuthi labo okunobufakazi bokuthi badle umhlaba, baboshwe. I-Land Invasion Control Branch yamaphoyisa, iyamlekelela umninimhlaba ukuba kususwe okwakhiwe ngokungemthetho endaweni yakhe ngalesi sikhathi esafaka isicelo sencwadi yesivimbelo senkantolo.
Sinxenxa wonke amalungu omphakathi ukuba abike kumasipala uma ebona izinkomba zokuthi kuzodliwa umhlaba. Kunenombolo yocingo ewu-031 311 4699 ephendulwa imini nobusuku, esicela ukuba umphakathi ushayele kuyona uma kukhona okunuka santungwana. Ngokusebenza ngokubambisana singakusiphula nezimpande zakho lokhu kwephulwa komthetho.