Sisule isigubhukane isikhulu
AbeSAB League babhikishe emdlalweni weMotsepe
KUSULE isigubhukane isikhulu se-Edendale Juventus egijima kwiSouth African Football Association (Safa) KwaZuluNatal ABC Motsepe League eshaye iNatal United ngo-2-1 ngoMgqibelo ntambama eWadley Stadium, eMgungundlovu.
Amagoli enqobe ngawo iJuventus avalelwe enethini nguQiniso Mahlobo noBush Xaba okubuyise ithemba kubanikazi bale kilabhu lokuzinza kulesi sigaba.
ILANGA lithole ukuthi uSizwe Mchunu obeyimenenja kwiJuventus, usule kungalindele muntu kule kilabhu edonsa kanzima kulesi sigaba.
Kuthiwa uMchunu ubesefuna ukuqhubeka nomsebenzi wakhe oseceleni. UMchunu ubesefana nomgogodla kule kilabhu kwazise ugabe nangesitifiketi sokuqeqesha sakwaSafa.
Ebuzwa uMchunu ngokudinsila kwakhe ikilabhu, uvumile ukuthi akaseyona ingxenye yeJuventus njengoba ezimisele ngokuqhubeka nokufunda.
UPhumelele Hlela ongomunye wabanikazi beJuventus, uvumile ukuthi uMchunu akaseyona ingxenye yekilabhu ngenxa yokuthi bafuna ukushintsha isimo sokuphathwa kwekilabhu.
Uthi basazobhunga ngozovala isikhala sikaMchunu ekuhambeni kwesikhathi.
* UMvoti FC uguqise iGWP Friends ngo-2-1 koweligi ngoMgqibelo ntambama eWorkington Grounds. Amagoli oMvoti FC avalelwe enethini nguBongani “Laffor” Nyembe noThobani Mthembu kwathi eleFriends leza noTumelo Tsoayane. ILadysmith United iguqiswe yi-Ashley United ngo-32 ngoMgqibelo ntambama eSettler’s Park, eMnambithi. IRainham Sporting ihlule iDurban FC ngo-3-2 ngoMgqibelo ntambama eChatsworth Stadium, eThekwini.
Amagoli eRainham kulo mdlalo abekwe enethini nguNkululeko Dlamini amabili noMenzi “Deco” Chili. AweDurban FC eze noMohamedoe Mustafa noPhilani Gwala.
* Kuzo ezeMotsepe League, kubhuntshe umdlalo weSafa KZN ABC Motsepe League ngenxa yezikhalo zamakilabhu agijima kwiSAB League ngoMgqibelo ntambama, eSugar Ray Xulu Stadium, eClermont.
Kuthiwa lesi siteleka besiholwa ngabaphathi bamakilabhu agijima kulesi sigaba kwazise izikhulu zibone kungcono ukuphazamisa ukudlalwa kwalo mdlalo othathwa njengomkhulu obuphakathi kweKwaDabeka Sporting neSummerfield Dynamos. Kubukeka lolu daba oluhaqe iSafa eThekwini ngodaba lokuphatha noma amandla selungena kwelinye igiya njengoba amakilabhu eselwa ngalolu hlobo ngokuqhinqa ezinkundleni.
UKwenzakwakhe Ngwenya, weSafa esifundazweni, wesabise ngokuthi iSafa izobathathela izinyathelo ezinzima labo abebeyingxenye yalo mbhikisho. Uthi ngenhlanhla banayo i- video, bayakwazi okwenzekile. Uthi kuyaxaka ukuthi abaphathi bamakilabhu kaSAB bangayophazamisa izinhlelo zeMotsepe League.
Wanderers 1, Milford 0; Friends 1, uMvoti FC 2; Ladysmith 2, Ashley 3; Juventus 2, Natal 1; KwaDukuza 0, Pmb City 0; Dbn FC 2, Rainham 3.